Centre-i nashi tepsettsü nokdangba anema Goa sorkari shidi zülutsü

Panaji, June 17 (Agencies): Tawa Centre sorkari shiruru ayokba market nung tepsettsü atema nashi, sü aser jang ayokba mesüra aliba tenokdangba agütsüba anema tanü Goa state minister kati, Centre sorkar tetuyuba ya ajanga lisopur melungjang nung tetsübu ka aitdaktsüogo, ta ashi.
Iba tetuyuba ashishia Goa sorkari Centre dangi shidi zülutsü lemtetogo.
State yimtiba, Panaji nung osangbenertem den jembidang state Agriculture Minister, Vijai Sardesai-i, “Iba onük nung ni Chief Minister, Manohar Parrikar den o lemtepogo, aser pai Centre dangi shidi zülutsü ta shiogo,” ta metetdaktsü.
Pais, “State sorkari iba tetuyuba nung onük kar ashishia jembitsü aser Prevention of Cruelty Towards Animal Act nung temelenshi kar atema asüngdangtsü,” ta metetdaktsü.
Centre sorkar tetuyuba ajanga Goa nunger melungjang nung tetsübu aitdaktsüogo; Goa nungeri, ‘sorkari ajak nem süngolemba achirtem dang kümdaktsüner’ ta bilemer, ta shia Sardesai-i, “Goa nung nisung aikati nashishi achir, anungji nüburtem melungjang nung terata alibatem atema jangjashitsütsü nüngdak,” ta ashi.
Paisa, “Sorkari Centre dangi shidi zülutsü lemtetogo, anungji Goa nungeri shisabulutsü menüngdak,” ta paisa shisem.