Centre-i National Highways yanglushitsü atema fund agütsü

Imphal, September 28 (Agencies): Union Minister for Road Transport and Highways Nitin Gadkari-i Manipur nung tzümetsüng agi raksatsür aliba National Highway tem tang atema yanglushitsü asoshi fund kar agütsütsü atema molungogo.
Mongolbarnü linük yimtiba nung Chief Minister Nongthombam Biren Singh den ajurutepba mapang pai iba tenangzükba ya agüja liasü, ta Imphal nungi osang ka ajanga metetdaktsü.
Cyclone Mora ajanga state taküm May ita kongshiba sülen taoba ita pongu tsüngda Manipur nung tzümetsüng agi timtem agüja arudar aser iba ajanga tongtibang highway, talisa Imphal-Mao sector nung National Highway 2 km 110 kanga mejungi raksatsüogo. Iba lenmang ya state nung mazüngtiba aser state atema tongtibangtiba lenmang ta züngshir.
Manipur nung lenmang dak sendakba ken o nung ajemdaker sensaksemba Union Minister-i maneni state sorkar dang National Highways aser tanga lenmang balala atema sentong tapet yanglur benoktsüba atema ajungshi.
Central sorkari Manipur nung Singhat-Behiang lenmang ya National Highway kümdaktsütsü asoshi molungogo aser arrtsü nung aliba Behiang yimtsüng ya Moreh jila sülen arrtsü nung shishilembadak tesem ka kümdaktsütsü asoshi terenlok bener arutsütsü atema tenangzükba agütsüogo. Imphal-Moreh National Highway atema ali mekazükba tembangba sülen Gadkari ali meshitetba sentong nung adentsü asoshi arutsü.
Ano Union Minister of State (Civil Aviation) Jayant Sinha aser Biren na tanga senden ka nung Singh-i Delhi nungi Imphal-i indang indanga aruba tayimtsü agütsütsü asoshi mepishi, kechiyong tang tashi nungbo ketdangsertem aser nüburtem parnok mapa anogo ka nung tembangaka parnok anogo asem tashi atatsüsa akümer. Iba temepishiba nung telangzüba agüja Jayant-i, iba amala timtem agintsütsü asoshi jenjang tapet agitsü tenangzükba agütsü.
Kasa mapang nung Union Minister of State for Tourism KJ Alphons-ia, Manipur kübok Sendra, Shirui aser Heingang-Marjing tesem tem nung Cable Cars senzütsüba atema benokdanga aliba maparen tekaratiba nung Centre-i asadangtsü asoshi nangzükogo. Iba ya Manipur nung raliwaliba tsütsü terenlok atema jenjang agiba lir. Tourism minister-i maneni taküm November ita 22 nü Manipur Sangai Festival mapang state semdangtsü atema molunga agizükogo.
Iba sülen Biren-i Air India mendenbuba aser Managing Director, Rajeev Bansal den ajurutepa, Air India tayimtsü ka Delhi nungi Imphal-i indang indanga ayimtsüba dak sendakba nung o lemteba liasü, aser Air India ketdangsertemi iba maparen atema jenjang tapet tekaratiba nung agitsü asoshi nangzükogo, ta kasa osang ajanga metetdaktsü.