Centre-i NE nem sen peria magütsür: Mukul Sangma

Shillong, Mongputeni (October) 3 (Agencies): Prime Minister Narendra Modi aser NDA sorkari Northeast kübok states nem senotsü sota ayur aser tangutsü tim magütsür ta taoba Meghalaya Chief Minister aser Opposition lennir Mukul Sangma-i ashi.
Centre nung tang aliba sorkari Northeast state tem tesüleni ludaktsütsü, ajisüaka sangküm Lok Sabha elections sülen non-BJP sorkar ka akümba ajanga special plan assistance maneni agütsütsü, ta paisa ashi.
2014 nungi Meghalaya nung residential schools lapoktsü atema special assistance kübok sen meyipa agi. Iba ajanga state sorkari khuret ajuru aser sorkar ket nung senotsü peria maliba ajanga mapa meinyaktet” ta Mukul-isa shisem.
Tang NDA sorkar mapang timtem ajuruba ama taoba Prime Minister asür Atal B Vajpayee lenisüba kübok majurudang. Modi-i aniba NDA sorkari Meghalaya nunger aser northeast nung alirtem atema mebilemtsür ta paisa metetdaktsü.
Vajpayee-i aniba sorkaribo Northeast atema DoNER ministry tentettsü nüngdak ajitet saka Modi aser par sorkaribo kounung nung Northeast indang khuret angateta lir ta shia taoba mapang Centre-i atongba policy aser sentongtem melenshi, ta Mukul Sangma-i ashi.
North Eastern Council (NEC) nungi aruba dena BJP aser Modi-i NE atema project aika indang senotsü sota lir, ta paisa ashi.
Union Minister temi Northeast nung gari lenmang dena infrastructure tem atema sen aika lemzüktsüogo ta ashiba atema Mukul-i “parnoki (minister) budget lemsadang senbo aika enoker, saka parnoki senotsü agütsüdangbo ajemer agütsür” ta ashi.
Tawa Union Minister for Road Transport and Highways, Nitin Gadkari-i Northeast state nung gari lenmangtem atema sen crore lakh 1.9 lemzüktsüba osang metetdaktsüba atema Mukul-i “Iba ya tang tasen masü aser project tasen kar lira onok kanga pelatsü” ta ashi.
Taoba UPA sorkar mapang Northeast nung gari lenmang project aika SARDP (North East) kübok agizük aser sen lemzüktsü, ta paisa shisem.