Centre-i Netaji Subhas Chandra Bose indang file tem sayatsü

New Delhi, January 22 (Agencies) : Netaji Subhas Chandra Bose asoba anogomung nung Centre-i pa dak sendakba kulikaket kar miimbanga aliba yimjak nung sayatsü.
Honibarnü Prime Minister Narendra Modi-i linük nüjiso atema rarar Netaji indang file tem public domain nung sayatsütsü ta tanü osang metetdaktsü.
Netaji indang tasoba anogomung nung par sorkari Netaji indang miimbanga aliba file kar yimjak nung sayatsütsü ta yaküm Modi-i nangzüka lir.
“Yaküm October 14 nü Prime Minister Narendra Modi-i Netaji’er kinüngertem den ajurutepa sensaksemdang, Netaji dak sendakba miimbanga aliba kulikakettem yimjak nung sayatsü ta ashi. Iba mapaji January 23 nü Prime Minister-i tenzüktsü” ta Tourism & Culture Minister Mahesh Sharma-i tanü metetdaktsü.
Iba sentong nung Netaji’er kinüngertem aser lennir kar adentsü amai imlar.
“Subhas Babu’er tasoba anogomung January 23, 2016 nungi Netaji dak sendakba file tem yimjak nung sayutsü” ta Modi-i Twitter ajanga lemsatepa liasü.
Yaküm West Bengal nung Mamata Banerjee-i aniba sorkari parnok ket nung aliba Netaji indang file 64 tashi yimjak nung sayaba sülen, Centre dang miimbanga aliba file tem yimjak nung sayutsü takhangba agütsüba ola tuluba aküm.
Netaji’er jala Anita Bose Pfaff-i la tebuji August 18, 1945 nü Formosa (tang Taiwan) nung tayimtsü lendong ka nung asü amai bilemer.
Netaji asüba indang kuli balala agüja jembibaji tamagitsü aser kuli mali ta Anita-i osangbenertem dang ashi.
La tebu tayimtsü lendong nungi kümzük aser “Gumnami Baba” ama liasü ta asüba otsü jembiba atema lai mepelar, ta Anita-isa metetdaktsü.
India linük nüjiso atema taküm bendanga agüja rara Netaji tayimtsü lendong nung asü aser Japan kübok Renkoji Temple nung pa indang mang rema aliba nung DNA tendangtsüla, ta Anita-isa takhangba agütsür.
National Archives of India-i Netaji indang declassified files 25 ji ita shia public atema sayatsütsü sentong lir.