Centre-i Nirbhaya Fund atema sen Crore 200 lemzüktsür

New Delhi, August 10 (Agencies) : Centre sorkari Nirbhaya Fund atema sen crore 200 lemzüktsüogo aser iba ajanga tashiyim agi raksatsüba tetsürtem nem teyari agütsütsü, ta Rajya Sabha nung Bodbarnü metetdaktsü.
Pei pei state aser Union Territory tem nung teyari agütsütsü indang osang sangoktsüogo, ta Minister of State for Home, Hansraj Ahir-i tanü ashi.
“State aser Union Territory temi ‘victim compensation scheme’ agütsübaji Centre ajanga magütsüi liasü. Ajisüaka, July 6, 2016 nung centre sorkari tetsürtem atema Central Victim Compensation Fund (CVCF) Scheme meyipa reprangshi aser state o union territory sorkartem yaritsü atema Nirbhaya Fund asoshi sen crore 200 ‘one time grant agütsütsü’ lemtet” ta Hansraj Ahir-isa metetdaktsü.
“State aser Union Territory temi takoksa ajurur nem teyari agütsüba nung memedemi aliba iba ajanga medemtsü. Ano külen parnoki ‘victim compensation schemes’ mapa küma inyaktsü asoshi ajungmesotsü. Criminal Procedure Code nung Arla 357A nung tashiyim agi raksatsüba, tim mesüi amshiba, tila tanur dak tashiyim mapa inyakba, nisung shibelenba amala inyakyim ajanga takoksa angur nem teyari agütsütsü lateta lir,” ta Minister of State for Home-isa Rajya Sabha nung metetdaktsü.
December 16, 2012 nü Delhi nung tetsür ka tebur telok kati kanga mejungi tashiyim agi raksatsüba tatalokba sülen 2013 küm Nirbhaya fund tentet.