Centre-i northeast nung gari lenmang yanglutsü : DoNER Minister

New Delhi, July 25 (TYO) : India kübok northeast tesem nung tesendaktep lenmangtem junga maliba khuret atema Centre sorkari gari lenmang yangluba nung temulung agütsütsü sentong lir, ta Hokolbarnü Minister of State for Development of Northeastern Region (DoNER), Jitendra Singh-i ashi.
Manipur nungi Socio-Economic Development Organisation (SEDO)-i pa den ajurutepa sensaksemdang Singh-i iba olen metetdaktsü.
Manipur kübok Churachandpur district headquarters Tuibong nungi Assam arrtsü anasa aliba Jiribam tashi Manipur o Assam tsüngda gari lenmang yanglutsü atema SEDO-i Singh den tebilemba lemsatep.
Gari lenmang tasentem yanglutsü atema dang masü saka tang alibatem tajungba küma yanglushitsü aser state o state tsüngda sendaktepba lenmangtem yanglutsü, ta DONER minister-isa metetdaktsü.
Letkho Haokip lenisüba nung SEDO teloki Singh nem tezüluba nung takhangba ka aser Manipur MP Thangso Baihe-i züluba shidi ka agütsü.
Tang Manipur aser Assam tsüngda aliba gari lenmangji state yimtiba Imphal nungi lenmang ka ajanga Silchar, Assam den sendakteper. Ajisüaka iba lenmang indang tasazükji kilometer 250 talang aser khu belenshidang timtem ajurur, ta SEDO tezüluba nung shia lir.
Tuibong nungi Jiribam tashi gari lenmang yanglura, iba jagi Manipur o Assam tsüngda kilometer 150 shi majung ka agi dang tepila alitsü, ta parnokisa shia lir.