Centre-i NSCN(K) küm pungu noktangtsü telemtetba agi; Naga nunger lennirtem aoksar

New Delhi, September 16 (Agencies) : Bodhbarnü Centre sorkari National Socialist Council of Nagaland (Khaplang) telok küm pungu noktangtsü telemtetba agiogo.
Tanü cabinet senden ka nung NSCN (K) ji ozüngi memelaba telok ta telemtetba agiogo, ta Union Minister for Communications and Information Technology, Ravi Shankar Prasad-i osangbenertem dang ashi.
Centre-i Unlawful Activities (Prevention) Act kübok NSCN(K) telokji ozüngi memelaba telok ta sangdongogo.
“Tawa NCSN(K)-i sepaitem aiben makogo anungji India sorkari kanga junga bilemdanger küm pungu atema NSCN(K) nokdangtsü telemtetba agi,” ta Prasad-isa ashi.
Tawa tu National Investigation Agency (NIA)-i NSCN(K) lennir ana- Niki Sumi aser S S Khaplang osang agütsür nem senpet agütsütsü metetdaktsüogo. Centre sorkari Nagaland nung yimjung bener arutsü atema mapa inyakba mapang ka nung NSCN(K) telok noktangtsü telemtetba agi.
Indian Intelligence Bureau ketdangsertemi ashiba agi, Khaplang ji tang Myanmar nung lir aser pa ULFA-I den tesentaktep tajung yua lir.
Khaplang-i ceasefire agientsü lemtetba ajanga India sorkar kanga aoksadaktsü aser NIA-i bushisüngdanga aodang, ceasefire agientsübaji Khaplang-i pa sasa lemtetba masü saka ULFA-I den asüngdangya asüba sülen agiba lir ta bushitet. Khaplang-i ULFA(I) den tesentaktep ayuba nung lendong keta lir, ta NIA ketdangsertemisa ashi.
ULFA(I) lennir, Paresh Baruah China nung jenoka lir aser idakji mulungtet telok aikati pa nem senotsü teyari agütsür. China nunger teka dena Khaplang-i ceasefire agientsü telemtetba agiba atema bushisüngdangtsü. Tanga linük ka nungi teyari mangu nungbo Khaplang-i iba telemtetba magila, ta NIA ketdangsertemisa metetdaktsü.
Centre-i NSCN(K) telok noktangba osang angashia Nagaland nung yimten aser lokti lennirtemi kanga aoksaba osang metetdaktsüogo.
NSCN(K) telok noktangtsü melena parnok den olemtep akatsü asoshi maongka agütsütsüla, ta lennirtemi ashi.
NSCN-K dang masü saka Naga yimten telok ajak olemtep nung shilem agitsüla aser ibaji asünungdang Naga yimten tebilemtsü atema telemtetba agitettsü, ta parnokisa shisem.
“Sorkari Myanmar nung NSCN-K lennirtem den ajuruteptsü temelaba agütsüba sülen iba telemtetba agiba atema onok kanga süngmanger aser iba ya taoksatsüka lir. Sorkari iba telemtetba agiba atema onok mepelar” ta Naga Hoho tir, Chuba Ozukum-i osangbener dang ashi.
Naga nunger mulungtet teloktemi tanüngba telok ajak dang Naga Peace accord agizüktsü atema tejembidak nung Centre sorkari Naga yimten tebilemtsü atema yamai inyakba ya mangateter, ta paisa ashi.
Nagaland nungi Rajya Sabha MP, Khekiho Zhimomi-ia ashiba agi, “India sorkari iba telemtetba ya kanga karara agi ta nibo bilemer. NSCN-K-i tanaben ceasefire tenagzükba agitsü atema parnok nem olemteptsü atema maongka peria agütsütsüla.”
Tawa tu Centre sorkari NSCN-K dang ceasefire tenangzükba agir yimjung olemtep nung adentsü mesüzük saka tanü telemtetba agibaji iba tangatetba den khenyongi meputep, ta Khekiho-isa ashi.
Minister of State for Home, Kiren Rijiju-ia ashiba agi, “Iba telemtetba ya sorkari agi, anungji ni kecha mejembii atatsü. Tatsüka lir ang ni iba onük jembitsü.”