Centre-i nübur amokmerentsü atema CBI amshir: Mamata

Kolkata, June 18 (Agencies): Tanü West Bengal Chief Minister, Mamata Banerjee-i, Centre sorkari mang ayangba inyakyim benshir, aser BJP-i yimsü masüba state tem nung nisungtem amokmerentsü atema parnoki CBI aser ED ama Central agency tem amshir, ta tai tongloktsü.
“Parnoki CBI, ED mesüra Income Tax Department ajanga ajak amokmerener. BJP sorkar maliba state tem nung parnok anema parnoki item central agency asem amshir,” ta Mamata-i ashi.
Trinamool Congress indang sentong ka nung jembidang Chief minister-isa, “Make In India” tenüng nung BJP-i linük tenüng yokshir, ta aitsü.
Parnoki linük tangatetbatem atema mebilemtsür, ta lai ashi.
Ato kilonser, Modi tenüng metetshiaka Mamata-i, Bengal nung mapa tajung atema tenüngji pai agitsü meranger aser yazü proker, ta ashi.
“Bengal nung onoki taila ration card crore 1.35 dak tema thitsüogo. Parnoki PDS leakage aika kümzüka sen crore 30,000 kümzükogo ta pai (Modi) jembir. Nirmal Bharat scheme kübok onoki junga inyakogo, ajisüaka parnoki Swachh Bharat inyaker ta tenüng agir,” ta lai ashi.
“Onoki Panchayat nung ICIDS nung inyaker tetsürtem atema account lapoktsüogo. Parnoki (BJP) iba account lapoktsü ta tenüng agir. Ayongayonga mener parnoki item mapatem indang twitter ajanga lemsateper aser tenüng tajungji agitsü meranger. Yazü kangabo mejembitsüla,” ta Mamata-i ashi.
Laisa lar party MP tem dang item taizüji Parliament nung jungkai adoka metetdakjang, ta ashi.
Totzü jenjang atuba atema CPI(M) aser Congress-i West Bengal kija nung longkak aiter, ta aija Mamata-i, “Anogoshia totzü jenjang atur. Aser kodangsa totzü jenjang tudir CPI-M aser Congress-i longkak aiter. Kechiba parnoki iba atema Delhi nung longkak maiter? Parnok office Delhi nung lir,” ta ashi.