Centre-i Police ketdangsertem nem Gallantry Medal agütsütsü sangdonger

New Delhi, January 24 (Agencies) : Linük sorkar-i gallantry medal 100 aser pei mapa takok ngua inyakteter police tem nem medal 597 agütsütsü metetdaktsüogo. Item medal ya police ketdangser tilatem nem agütsütsü.
IPS rongnung iba medal angutsü purji Assam nungi Sunil Kumar kija lir. 2014 küm Kokrajhar, Assam nung pa lenisüba kübok National Democratic Front of Bodoland (NDFB) telungpur mita aoba mapa takok ngua inyaktetba ajanga pa nem iba medal ya agütsütsü shim.
Manipur nungi P. Sanjoy Kumar-i tan agi gallantry medal 8buba angutsü aser Jammu & Kashmir police nungi Nazir Ahmed Kuchey-i 2014 aser 2015 nung tasü tait mapa balala ana inyaktetba atema taküm kümsa medal ana agütsüogo.
Tenüngsang ngutettsüsa inyakteter nem iba medal noklang nung shilem 63 agütsütsü aser item medal ji constable aser head constable tem dangi aotsü. IPS officer 15-i iba medal nguogo ajisüaka takümbo shingaia president’s police medal mangu.
Taoksatsüka, linük commando force, NSG nungibo taküm küm iba medal angutsüsa shinga maliasü. Para military force rongnungi item medal timba ka CRPF dangi aotsü aser iba sülen BSF nungi nisung 5 aser SSB nungi nisung kati ta angutsü.