Centre-i Rajiv Gandhi tepsetertem chioktsüla: Karunanidhi

Chennai (Tamil Nadu), March 05 (Agencies): Taoba mapang Ato kilonser, Rajiv Gandhi tepsetba ken o nung aija tepoukdak alir parnok tenetprongla chioktsüla ta takhangba maneni agüja tanü DMK Tir, M Karunanidhi-i, parnok chioktsü atema Centre sorkar mesüra state sorkar tashi nung aliba AIADMK-i tuyutsüla, ta ashi.
Party sangdong ka ajanga Karunanidhi-i, “Aija alirtem chioktsü onük nung Tamil Nadu sorkari kechi mimshitsü, kechiyong parnok chioktsü atema mapang talangka agir, Centre-i iba ken o ya meimchir dang temeim sayuba tangatetba nung ajemdaker inyaktsüla,” ta ashi.
Parnok chioktsü atema shirnok dak tashi lir (?) ta state mesüra Centre, mesüra courts tsüngda o metoktepi chioktsüla ta shia pai, “India Temzüng Arrla 161 kübok state sorkari tetuyuba agütsütsüla mesüra Centre-i aibelenertem chioktsü atema inyaktsüla,” ta ashi.
Pai ashiba agi, aibelenertemji tesüiba küm 24 dak tema tepoukdak timtemdar aser Home Minister Rajnath Singh-i Parliament nung jembiba o ajanga Tamil Nadu sorkari mepishibaji agizüktsü atema Centre-i reprangshidar ta imlar.
Taoba hopta Tamil Nadu Chief Secretary, K Gnanadesikan-i Union Home Secretary Rajiv Mehrishi dang shidi ka ajanga, taoba ato kilonser tepsetba ken o nung aitsür tepoukdak alir parnok tenet- V Sriharan (Murugan), T Suthendraraja (Santhan), AG Perarivalan (Arivu), Jayakumar, Robert Payas, Ravichandran aser Nalini nunger chioktsü state sorakri telemtetba agiogo ta shia kasa atemaji Centre danga asüngdanga liasü.