Centre-i sen anentsüba anema Congress züngsemtemi lungkak ait

Dimapur, November 28 (TYO): Centre-i sen anentsüba anema Opposition-i linük ajunga nung lungkak aitba sentong agitsü ayongzükba nung ajemdaker Nagaland Pradesh Congress Committee (NPCC)-ia Hombarnü Super market, Dimapur nung sentong ka ayongzüka agi.
Narendra Modi’er sorkari ozüng alema amshiba sen aser ochimashi maparen azüoktsü atema sen anentsüba ya pei atema dang bilema inyakba mapa ka lir aser iba telemtetba ajanga linük indang rongsenkettsüng kanga mejungi kongshiogo, ta NPCC president, K. Therie-i ashi.
Sen anentsüba ajanga Nagaland nunga yimtsüng nung alirtem timtem tulu ajurur kechiyong parnoki ‘plastic’ sen mamshir. Nagaland nung aliba bank tem teimbaka yimtsüngtem dang nungi pilar lir aser iba jagi yimdaklirtemi ‘banking system’ junga memetet, ta paisa shisem.
Sen tasen peria manguba den ano sen jenjang tajembatem manguba ajanga nübortem timtemer aser iba khuret ajanga rongsenkettsüng indang maparen anendaka lir. Ozüng alema sen miimbanga aliba bener marutetba tamakokji nübortem ajanga masü saka tanga aliba sorkar ajanga lir. Anungji, iba onük asoshi nübortem memerenshitsüla, ta K. Therie-isa metetdaktsü.
Prime minister Narendra Modi-i tarutsü atema mebilemdangi sen anentsü telemtetba agi aser iba inyakyim ajanga linük nung rongsenkettsüng takoksa ajuruba mekoktettsü, ta paisa shisem.
Anungji, Centre sorkari sen tasen peria menünga magütsü tashi senpak 500 aser 1000 amshidaktsütsüla aser jila nungi pila aliba tesemtem nung banking service tenzüktsü akhanger, ta Congress party-isa metetdaktsü.
Tanü Kohima District Congress Committee (KDCC)-ia Prime Minister Narendra Modi-i senpak 500 aser 1000 anentsüba anema lungkak aitba sentong ayongzüka agi.
Congress Bhavan nung sentong agidang taoba minister Seyiekuolie aser MLA Medokul Sophie nati anir KDCC ketdangpurtem aser lennir tejentem aika aden.
Sentong agiba sülen Seyiekuolie aser Medokul Sophie nati anir züngsem noklang aikati Kohima Deputy Commissioner indang office tashi jajayonga ao aser tezüluba nung takhangba ka agütsü.