Centre-i sensakertem atema tenzüktsüba scheme tem tangutsüpur matonger

June 6, 2017 nü Kohima nung Great Membership Drive tenzükba sentong nung BJP President Visosalie Lhoungu aser Kohima District Unit president Dr. Khriezovolie Kesiyie na den BJP Kohima Unit ketdangpurtem külemi agiba noksa angur.

Kohima, June 6 (TYO): Centre nung BJP sorkari sensakertem atema scheme aika tenzüktsüogo saka itemji state nung teküpoktiba jenjang nung alirtem matonger, ta BJP Nagaland-i tanü ashi.
Tanü Kohima nung BJP Kohima Unit office nung Great Membership Drive sentong tenzükdang BJP Nagaland tir, Visasolie Lhoungu-i iba osang metetdaktsü.
“BJP-i sorkar akümtsü atema kanga meranger aser 2018 elections nung onok nem sorkar akümtsü maongka agütsüra, sensakertem atema tenzüktsüba scheme ajak indangindanga atongtsü atema mapa inyaktsü. State ajungalen onoki terenlok kasa agütsütsü atema inyaktsü” ta Visasolie-isa ashi.
“BJP-i tongti süa bilembaji nübortem nüngdak, teimla, taginüba aser imlabatem lir” ta paisa shisem.
Prime Minister Modi indang mangdang aser teinyaktsü sentongji sorkari sensaksertem, lanurtem, yimdaklirtem aser aluyimertem aser loktiliba nung tangar memenepertem ajungktettsü atema lir, ta BJP Nagaland tirisa metetdaktsü.
BJP ya yimtenren telok tulutiba lir aser onok indang mangdangji tanga yimtenren teloktem dang nungi balaka lir. Tanga teloktemi gari lenmang, electricity, education, water supply amala onüktem jembir saka onoki item dak alia teküpoktiba jenjang nung alirtem ajungkettsü atema temulung agütsür, ta paisa ashi.
BJP sorkari “Saab ka saath, saab ka vikas” omen kübok inyaktsü. Iba Great Membership Drive kübok BJP-i taruba State General Election matongdang nisung lakh 5 BJP nung züngsem kümdaktsütsü alizüng lir, ta paisa shisem.
Nisung kati paper form nung mezülui aser registration fee kecha magütsüi dang toll free number 1800-266-1001 nung missed call ka agütsüba ajanga BJP züngsem akümtsü akok. Tang Nagaland nung BJP primary members lakh 1.5 shi lir aser iba Great Membership Drive ya June 25, 2017 tashi agitsü, ta Lhoungu-isa ashi.
Iba maparen takok ngua inyaktsü atema Centre nungi lennirtem-i state semdangtsü aser külen State lennirtemi district units semdangtsü aser district level lennirtemi den Constituency level semdangtsü, ta paisa shisem.
Tanü agiba Great Membership Drive sentong nung mendenji BJP Kohima District Unit, Dr Khriezovolie Kesiyie liasü.