Centre-i smart cities 10 sangdongtsü

New Delhi, December 08 (Agencies): Sangküm January ita tatemlen tashi nung Centre sorkari Smart City Mission kübok smart city 10 sangdongtsü, ta Hokolbarnü sorkar ketdangsertemi metetdaktsü.
Tang tashi nung Housing & Urban Affairs Ministry-i iba scheme kübok smart cities 90 sangdongogo, aser iba scheme kübok project balala inyaktsü atema Centre-i smart city shia nem senotsü teyari crore 500 agütsütsü.
Iba scheme kübok smart city 100 nung terenlok mapa inyaktsütsü sorkar sentong lir.
New Delhi nung osangbenertem den jembidang Housing & Urban Affairs Secretary, D S Mishra-i, “Iba maparen tenzükogo. Onoki yimti aika nungi yimti shimtsü atema temepishiba shidi nguogo. Taruba smart cities 10 ji sangküm January tatembanglen tashi nungbo sangdongtsü,” ta metetdaktsü.
Smart Cities mission pongububa aser tatembangbuba round nung yimti 15-i Ministry nem temepishiba shidi agüja lir, ajisüaka yimti ponguibo parnok indang project asalentong agüja mali, ta ministry ketdangser kati ashi.
Smart cities atema temepishiba aguja aliba yimtitem rongnung Itanagar (Arunachal Pradesh), Biharsharif (Bihar), Amravati (Maharashtra), Erode aser Dindigal (Tamil Nadu), aser Uttar Pradesh nungi Moradabad, Meerut, Saharanpur, Bareilly, Rampur, Rae Bareli aser Ghaziabad yimtitem lir, ta ketdangserisa ashi.
Ano Silvasa (Dadra & Nagar Haveli), Kavarati (Lakshdweep) aser Diu (Daman and Diu)-ia temepishiba agüja lir.
Iba scheme kübok West Bengal nung Bidhannagar, Durgapur aser Haldia yimtitem, Meghalaya nung Shillong aser Maharashtra nung Greater Mumbai yimtitemibo temepishiba magütsü.
Ajisüaka West Bengal sorkaribo parnoki Centre indang Smart City programme nung shilem magitsü, ta tamalen sangdonga lir.