Centre-i Smart City atema yimti 9 bendenlok

New Delhi, July 2 (Agencies) : Urban Development Ministry-i Smart Cities Mission tetoktepba nung yimti talila 9 züngsemtsü atema temelaba agütsüogo.
Yimtenren tsütsü inyaktsüsa akümba agi Urban Development Minister, Venkaiah Naidu-i taruba Smart Cities Mission tetoktepba nung adentsü atema Patna, Thiruvanthapuram, Bengaluru, Amravati, Itanagar, aser Gangtok densema state yimtiba 9 tashi bendenlokogo, ta tanü osang ka ajanga metetdaktsü.
Urban Development Ministry-isa Jammu & Kashmir asr Uttar Pradesh sorkartem dang Meerut aser Rai Bareli yimtitem tenüng agütsütsü temelaba agütsüogo, ta osang ajangasa shisem.
India nung Smart City temji shilem ana lemsar agiba maparen ka ajanga shimtsü. Mezüng, state kati tongtipang yimti ka shimtsü aser ibaji Centre nem agütsütsü aser iba sülen shimtetba yimtiji tanga yimtitem den tokteptsü, ta yaküm Smart City indang teinyaktsütem sangdongba nung shia lir.
Taküm January ita Urban Development Ministry-i yimti 20 shimogo aser taküm küm matemdangsa yimti 40 shimtsü.
Smart City atema shimba yimti shia nem Centre-i taruba küm pungu atema sen crore 500 agütsütsü aser state sorkartemia Centre-i agütsüba ama sen agütsütsüla.