Centre-i state nung rara adokdaktsütsü meranger: Mamata

Kolkata, July 08 (Agencies): West Bengal kübok North 24 Parganas district nung raraba tensa mapang ka nung tanü West Bengal Chief Minister, Mamata Banerjee-i, iba rara ya Centre tai ajanga lir, ta metetdaktsü.
Tawa Baduria, Swarupnagar, Deganga aser Basirhat nung tatalokbatem ajanga state nung tamangba lokti balala tesünep nung aliba raksatsüba dak sendakba nung Banerjee-i, “Basirhat nung rara ya Centre tai ajanga lir. Darjeeling tensa azüoktsü atema sepai tali meyoksemba ajanga Centre-i amalitepa meinyaker,” ta ashi.
Laisa, mapang shitak nung sepaitem meyokba ajanga West Bengal arrtsülen rara taliba adoker, ta ashi.
Trinamool Congress lenirisa, rara adokdaktsütsü atema BJP-i aniba sorkari Bhojpuri film tem nungi noksatem yanglushia proker, ta aitsü.
Haryana nung BJP lenir, Vijeta Malik-i , West Bengal nung Hindu nunger atema tebilemtsü katsür ta shia Bhojpuri film, Aurat Khilona Nahi nungi noksa ka lemsatepba dak sendakba nung Mamata-i iba o jembi.
Mamata-isa, Centre-i state nung Tir yimsüsüba benokner, ta aitsü. Laisa, Baduria aser Basirhat nung tatalokbatemji judicial-i bushisüngdangtsü, ta metetdaktsü.
Darjeeling nung Gorkhaland atema takhangba agütsüba dak sendakba nung Banerjee-i, “Ni Darjeeling nungertem dang meraratsü saka yimjung yanglutsü mepishir. Ken o jembiba ya democracy inyakyim ka lir, ajisüaka yimjung tama alitsüla,” ta ashi.
Puducherry, Kerala mesüra West Bengal state temi Centre anema ola adokba ajanga yimtenren tsütsü nungi item state anema inyaker, ta lai ashi.
July 5 nüa Banerjee-i, tamangba lokti tsüngda rara adokdaktsütsü atema BJP-i social media tim mesüi amshia olulu proker, ta aija liasü. “Rara adokdaktsütsü atema BJP ket nung license mali, ajisüaka parnoki aji inyaker. Parnoki nüburtem tsüngda tesempa proker,” ta laisa aija liasü.