Centre-i state tem dang district 80 jungjunga mokdangtsü tuyu

New Delhi, Metsüremi/March 23 (Agencies): Centre sorkari state sorkartem dang coronavirus tashidak puteta aliba district tem jungjunga mokdangtsü aser aibelenertem nem temerenshi agütsütsü atema tuyuogo, ta Hombarnü ketdangsertem sangdong ka ajanga metetdaktsü.
Coronavirus tashidak puteta aliba district 80 March 31, 2020 tashi jungjunga mokdangtsü atema Amongnü Centre aser state sorkartemi telemtetba agia liasü.
Coronavirus tashidak prokba nokdangtsü atema passenger transports nokdangtsü rongdak nüngdak kümogo, ta Centre aser state sorkartemi bangjema liasü.
Ajioda Delhi-a March 23 anepdang 6:00 ako nungi March 31 ayaterm tashi mokdangtsü. Iba dak alia state kar nunga March 31 tashi mokdangtsü.
Iba mapang nungji Delhi arrtsü ajak shibangtsü saka health dak sendakba services, chiyungtsü, tzü aser power supply bo alitsü aser kanga nüngdakba services agütsütsü atema DTC bus shilem 25 bo senzütsü.
Hombarnü Ato kilonser, Narendra Modi-i state sorkar tem dang coronavirus dak sendakba mokdang mapang temzüng ozüng ajak shidak benshitsüla, kechiyong nisung aikati tenokdangbatem süoki ia magir, ta metetdaktsü.
“Tang tashi nisung aikati item mokdang ya süoki ia magir. Yimlibilema na aser ner kibong kümzüka liang aser tetuyubatem shidak benshiang. Ni state sorkar tem dang iba dak sendakba ozüng ajak shidak benshitsü mepishir,” ta Modi-i Hindi oshi nung twitter ajanga metetdaktsü.