Centre-i state tem dang lendong balala atema renema alitsü tuyur

New Delhi, Monupii/May 18 (Agencies): Tanü Centre sorkari state sorkartem dang alima tzü-mopung lendong balala atema junga renema alitsü tuyuogo.
Alima tzü-mopung lendong balala ajanga India nung taküm 2,200 samaogo aser küm shia lendong balala ajanga sen crore 60,000 takoksa angur, ta shia Centre-i iba tetuyuba agutsüogo.
State relief commissioners & secretaries senden nung jembidang Union Home Secretary, Rajiv Gauba-i, 2005 nungi 2014 küm tashi nung alima tzü-mopung lendong balala ajanga India-i küm shia sen crore 60,000 shi takoksa nguogo, aser item lendong balala rongnung tamajungtibaji tzümetsüng lendong liasü, ta metetdaktsü.
Iba dak sendakba nung Gauba-i Central aser state sorkartem nungi ketdangsertem dang, tzümetsüng, yipru mopung aser menoknok ama tzü-mopung lendong balala ajanga takoksa anguba ajema akumtsü atema renema alitsüla, ta metetdaktsü.
“Tsüngsang-mopung junga asadangtetba, mock drills agiba aser resource management ajanga asenoki tamalen dang nungi tang tajungba inyakdar,” ta pai ashi.
Gauba-isa, India ya tzümetsüng lendong bulua atalokba tesem ka lir, aser item lendongji mapang tatsüka nungdang ataloker, saka asenoki junga renema lira takoksa ajema akumtsü, ta metetdaktsü.
“Tesüiba küm aika tsüngda asenoki meranga inyakba ajanga alima lendong balala ajanga teraksatsüba ajema kümogo, ajisüaka asenoki ano tang dang nungi tajungba inyaktettsü,” ta paisa ashi.
Home Ministry-i maneni item ama mapang nung state tem nem teyari agutsütsü, ta shia Gauba-i state tem dang Centre dak metaloker aliba ajema akumtsü atema state temi meranga inyaktsüla, ta ashi.
Kasa sentong nung National Disaster Management Authority (NDMA) nung züngsem, R K Jain aser Director General, National Disaster Response Force (NDRF), Sanjay Kumar natia jembia liasü.
Anogo ka senden nung UT aser state balala nungi relief commissioner tem, India Meteorological Department, Geological Survey of India, Defence Ministry aser Central Water Commission nungi ketdangsertem dena liasü.