Centre-i state tem dang loktii nisung tepsetba nokdangtsü tuyu

New Delhi, Chiteni/July 05 (Agencies): Tanü Centre sorkari State tem aser Union Territories (UTs) dang social media ajanga tanur apurtem lir ta olulu prokshia loktii nisung tepsetba mita nokdangtsü atema tetuyuba agutsü.
Tesüiba ita ana tsüngda social media ajanga tanur apurtem lir ta olulu prokshiba nung ajemdaker linük tesem balala nung nisung 20 dak tema tepsetogo, aser item rongnung Maharashtra state kübok Dhule district kija nunga nisung pongu tashi tepsetogo.
Home Ministry-i States aser UTs dang tanurtem puer aortem aliba olulu mita reprangtsü aser itemji nokdangtsü atema tetuyuba agutsü.
Home Ministry nung otongdar kati, “Centre-i Centre-i State tem aser Union Territories (UTs) dang social media ajanga tanur apurtem lir ta olulu prokshia loktii nisung tepsetba mita nokdangtsü atema tetuyuba agutsüogo,” ta metetdaktsü.
States aser UTs dang district administrations dang item ama tesem jangjatsü aser awareness agutsütsü atema tetuyuba agujang ta Home Minitry-i metetdaktsü.
State aser UTs dang tanur apuba ken o tem junga bushisüngdangtsüla, ibaji ajangadang nüburtemi ketdangsertem dak melung lemtettsü, ta Home Ministry-i metetdaktsü.
Sangtennü/Mongolbar Centre sorkari WhatsApp dang olulu prokba nokdangtsü atema mera agia inyaktsü asüngdanga liasü.
Iba telangzübaji agüja yashi US nung amenoka aliba social media sabang- WhatsApp-i, osang tai aser tashishitsü osangtemji sorkar, lokti tentettem aser technology company temi mita reprangtsüla, ta metetdaktsü.