Centre-i state tem nem MGNREGA sen agütsüogo

New Delhi, April 09 (Agencies): Supreme Court-i MGNREGA scheme atema sen peria melemzüktsür ta ashiba sülen anogo ana sülen tanü Centre sorkari MGNREGA scheme atema state tem nem sen crore 12,230 agütsüogo.
Ministry osang ajanga ashiba agi, iba scheme atema ministry-i khen nung sen teimtiba agütsübaji iba ya lir.
Sangdong ka ajanga Rural Development minister, Birender Singh-i, Mahatma Gandhi National Rural Employment Guarantee Act (MGNREGA) atema par ministry-i Centre shilem sen crore 12,230 agütsüogo, ta metetdaktsü.
Minister-isa ashiba agi, iba sen ajanga financial Year (2015-16) nung sentsüh aliba aotsü aser financial year tasenba (2016-17) atema-a state temi iba sen amshitsü.
Paisa, iba programme nükjidongtem ataloktsü atema sorkari senotsü peria agütsütsü atema inyaktsü, ta metetdaktsü.
Bodhbarnü Supreme Court-i Centre dang, sorkari MGNREGA atema state tem nem senotsü peria magütsür ta ashiba den külemi tzünglu junga maruba ajanga timtem ajuruba state tem nung iba scheme nungi sen teintokba osang tejangja agüjang ta tuyua liasü.
Supreme Court-isa Centre dang, item teyariji küm ka sülen agütsütsü masü saka tangsa agütsütsüla, ta ashi.
Justice, M B Lokur-i aniba bench-i, “Nenoki item senotsü magütsüra shingaia mapa meinyaknütsü. State temi parnok ket nung senotsü mali, ta ashitsü, anungji parnoki  MGNREGA mapa atema shinga nem sen magütsütettsü. State katia nüburtem dang nangzükba meinyaktettsü,” ta ashi.
Ajisüaka Additional Solicitor General, Pinky Anand-i SC bench dang, taruba anogo ana tsüngda Centre-i sen crore 7983 agütsütsü aser June ita nung sen crore 2400 agütsütsü ta metetdaktsü.
Laisa, tzünglu maruba ajanga timtemba state tem nem sen crore 2723 agütsüogo, ta metetdaktsü.
Rural development minister-isa, “2015-16 küm MGNREGA kübok sen crore 41,371 intokogo, aser iba scheme tenzükba sülen iba ya sen intokba teimtiba asütsü. Iba teintokba nungi sen crore 30,139 taa agütsüba nung intok,” ta ashi.