Centre-i Swine Flu atema tetuyuba agütsü

New Delhi, March 1 (Agencies) : Sorkari state ajak dang swine flu azüoktsü atema renema alitsü tetuyuba agütsüogo ta Mongulbarnü Rajya Sabha nung metetdaktsü.
“Sorkari state aser UT ajak dang H1N1 Influenza anema mapa inyaktsü renema atatsü tetuyuba agütsüogo” ta Union Health Minister J P Nadda-i ashi.
Tetuyuba agütsüba nung surveillance, laboratory diagnosis, mozükitem nung screening centres aser ventilator beds dena isolation wards nungertem indang shia lir, ta paisa metetdaktsü.
Centre-isa state aser UT sorkartem dang protective equipments aser Oseltamivir mozü rizünga ayutsü aser nübortem dang wara indang osang meteta lidaktsütsü atema shiogo, ta Nadda-isa shisem.
Rajasthan aser Punjab dena state balala nung swine flu ajanga shiranger nisung 62 asüba sülen Centre sorkari iba tetuyuba agütsür.
Taküm January aser February itatem Rajasthan nung swine flu agi shiranger nisung 34 asü. Rajasthan nungi samples 2,000 bendenba nungi nisung 162 dak H1N1 virus aliba putet aser parnok rongnung nisung 34 asü, ta Nadda-isa tanü Rajya Sabha nung ashi.
Ano tawa Punjab nung nisung 7 swine agi shiranga asüba osang metetdaktsüogo aser Haryana nunga iba tashidak ajanga nisung pezü asü.