Centre-i tan ita ‘dearness allowance’ shilem 2 tutsütsü

New Delhi, March 5 (Agencies) : Tan ita tatemlen Centre-i sorkar mapa inyaker nem ‘dearness allowance’ shilem 2 shi ka ajungkettsütsü akok.
Iba ya sorkar mapa inyaker lakh 50 shi ka aser pensioner lakh 58 shi ka atema asütsü.
Kechisarena nung jenjang atuba khuret koktettsü atema mapang shia sorkar mapa inyakert nem ‘dearness allowance’ aser ‘dearness relief’ ajungkettsür. Ajisüaka, labour union temibo DA shilem 2 shi ka atuba ajanga khuret mekoktettsü ta ashir.
“Centre-i inyakba mapa nung dearness allowance shilem 2 ajungkttsüba lemteta lir aser iba ya January 1, 2017 nungi tenzüktsü” ta Confederation of Central Government Employees’ President, K K N Kutty-i ashi.
Ajisüaka, tera dang atuba atema mepelar, kechiyong ‘dearness allowance’ atutsü atema consumer price index for industrial workers (CPI-IW) lemteta aliba ama meinyaker, ta Kutty-i ashi.
Labour Bureau aser Ministry of Agriculture nati jenjang atuba asadangba nung tepila lir, ta paisa shisem.
CPI-IW ya pungmang ka dang lir aser Labour Bureau-i data shitak mebendenba ajanga iba ya mapa küma meinyakteter, ta Confederation of Central Government Employees’ President-isa metetdaktsü.
CPI-IW ajanga January 1 nungi December 31, 2017 tashi DA atutsübaji shilem 4.95 ta asadangteter. Yaküm October ita sorkar July 1, 2016 nungi tenzüka DA shilem 2 tutsü aser tang parnoki ano shilem 2 tutsütsü.
Yaküm küm tetenzüklen sorkari DA shilem 6 ajungkettsü aser ibaji basic pay nung shilem 125 liasü. Ajisüaka, 7th Pay Commission sülen DA ji basic pay den külem loktep.
Tang ya Central government employee aser pensioner tem dearness allowance shilem 2 angutsü lemzükja lir aser ibaji July 1, 2016 nungi tenzüker asütsü.