Centre mapatongtem ajanga aluyimba nung timtem adoker: BKS

New Delhi, June 11 (Agencies): Linük nung aluyimertemi sorkar dang nungi senotsü teyari meshia takhangba agütsüba mapang ka nung RSS den affiliate süa aliba aluyimer tenet, BKS-i, Centre sorkar mapatongtem ajanga linük nung aluyimba tsütsü timtem adoker, ta tai tongloktsüogo.
BKS National Secretary, Mohini Mohan Mishra-i, Centre sorkari aluyimertem atema tongtibangsüa meinyaker, aluyimertemi parnoki alu nungi züsentetbatem nung sen tali meshia akhanger, ta ashi.
“Centre-i talirtem aser chiyungtsü nung sen atuba atema dang bilemtsür. Sorkari aluyimertem atema mebilemtsür,” ta Mishra-i osangbener dang ashi.
Paisa, “Aluyimertemi aluyimba dak sendakba osettem maximum retail prices (MRP) agi alir. Süra kechiba parnok nem minimum selling price (MSP) agütsütsü?,” ta asüngdang.
Mishra-isa, “Tanübo aluyimertemi parnoki züsentetba atema sen shitak mangur,” ta ashi.
Iba denji kasa sorkari wheat nung import duty ajema kümtsüogo, ta ashi.
Tang Madhya Pradesh nung aluyimertemi longkak aitba dak sendakba nung Mishra-i, tang state nung mepetmesü adoka aliba ya meshitaki inyakba kuli kar ajanga lir, ta ashi.
“Ajisüaka state sorkari aluyimertem züsentetbatem atema nüngdakba mapa meinyakba ajanga aluyimertem jashi,” ta paisa metetdaktsü.
“State sorkari aluyimertem anema mapatong balala benokba anema June 15, 2017 nü nungi tenzüka BKS-i mapang telatet ka makai longkak aittsü,” ta paisa metetdaktsü.