Centre nung BJP tashii aruba sülen akhümtsübutep mali: Leo Cornelio

Bhopal, December 21 (Agencies): Khristmas benjung mapang ana nung lia tanü Bhopal Archbishop, Father Leo Cornelio-i actor Aamir Khan dak atalokba aser Jabalpur nung Laishiba azünger Khristan telok ka amakba indang tatishitsü amshia pai, Centre nung BJP sorkar tashii aruba sülen akhümtsübutep maliba tali züiner, ta ashi.

Khristan lenirisa nüburtem dang iba onük nung tangatetba balala süaka tangatetba balala ajakji akhümtsübutsüla, ta ashi.

Khristmas atongtsü ana nung lia Bhopal nung osangbenertem senden ka nung jembidang pai, “Tawa, talisa Centre nung sorkar tasen tashii aruba sülen akhümtsübutep maliba züiner ama ni bilemer. Actor Aamir Khan tatishitsü agiang, iba onük nung pai kinüngtsüi tebilemtsü akaba indang jembi, ajisüaka yimtenren nung sentaktepa alirtemi pa anemba yimyaji tim masü,” ta ashi.

“Linük nung ajaki sademsadema jembitsü temeten lir aser ibaji anemtsü atema dangbo asenoki manemtsüla,” ta pai ashi.

Khristan lokti ka nung tekolak ama pai BJP-i yimsüsüba state tem nung akhümtsübutep maliba ajangshia ali asü (?) ta asüngdangba langzüdang Cornelio-i taküm March ita Jabalpur nung Khristan kar Laishiba zünga lia Right wing force temi amakba indang ashi.

“Iba tatalokbaji paitoktetla ka liasü. Speaker nung ola tulu mesüra langka kar ajanga minprongba ajanga na mepelara nai parnok dak ola ajemang ta mepishitettsü. Nai tashiyim ajanga meinyaktsüla,” ta pai ashi.

Item ama tatalokatem dak sentakba nung pai, “Iba onük nung sorkari mera agia mali. Nisung karbo puogo saka ano aika mepui lir,” ta ashi.

Khristan temi nüburtem parnok tamangba yimsü dangi meyipdaktsür ta aitsüba dak sentakba nung pai, “Onoki nisung kar meyipdaktsütsü nükjidong nung meinyaker. Onok mapatem ajanga melung ser kari Khristan yimsü azüitnüra, ibajibo pa/la kija melung. Onoki kodanga shinga kangshia merongshir,” ta ashi.