Centre nung lenir asütsü Nitish Kumar temsüa lir: Marandi

New Delhi, April 15 (Agencies): Jharkhand nung mezüng Chief Minister, Babulal Marandi-i Ato kilonser, Narendra Modi anema Bihar Chief minister tenüngsanga, linük yimtenren tashitait ka nüngdaker, aser iba atemaji Nitish Kumar temsüa lir, ta ashi.
2000 küm Bihar nungi state tasen Jharkhand jazükba sülen state tasenba nung mezüng BJP sorkar chief minsiter ji pa liasü, ajisüaka tesülen pai BJP toktsü.
Delhi nung interview ka agiba mapang pai, “Linük nung tashitait sorkar nüngdaker. Centre nung tajungbaji Nitish Kumar asütsü. Bihar chief minister-i pa dak yimsüsüba sempet aliba kuli sayutetogo, aser linüki pa agizükteter,” ta ashi.
Bihar, Jharkhand aser Uttar Pradesh state tem nung Nitish Kumar’er JD (U), Ajit Singh’er Rashtriya Lok Dal, Marandi’er Jharkhand Vikas Morcha (Prajtantrik) aser Kamal Morarka’er Samajwadi Janata Party party tem sabang ka nung longjemtsü atema jembiba mapang ka nung tribal lenir, Marandi-i iba o jembiogo.
Yaküm Bihar assembly election nung Nitish Kumar-i Lalu Prasad’er RJD den longjemer BJP-i aniba NDA tamakok mejungi ngudakja liasü, aser maneni pai linük yimtenren nunga par party ajemoktsü merangdar.
Taoba Deobarnü Kumar-i JD(U) Tir, Sharad Yadav melenzükogo, aser 2019 Lok Sabha election matongdang pai party tem lonjemtsü atema inyaktsü, ta jembiogo.
Maneni Modi aija Marandi-i, “Linük nung Modi Ato kilonser akumba mapang nungi linük Temzüng maneni kongshir. Tanga party tem nungi MLA temi party anema apusoba ya tebilemtsü tulu ka lir. Parnoki (BJP) iba ya Jharkhand nungi tenzük,” ta ashi.
“Tamangba lokti balala tesünep nung aliba raksatsütsü meranger. BJP sorkar aruba sülen ita 15 tsüngda Jharkhand kija nunga tamangba lokti tsüngda rara 55 lir. Shiruru shishilembar ana alenseta südaktsüogo,” ta paisa ashi.
Marandi ya Santhal tribe nungi lir aser pa tarak maket lenir ka ta züngshir, iba den külemi kasa tribe nungi JMM tongti, Shibu Soren tambur akumer asünung pai tribal lenir Soren melentsü ta imlar.