Centre nung sorkarji UP aser Bihar nati lemtettsü: Tejashwi

Lucknow (Uttar Pradesh), January 14 (Agencies): Lok Sabha election atema Uttar Pradesh nung BSP aser SP na loktepba osang sangdongba sülen anogo ana lir tanü RJD lenir, Tejashwi Yadav-i, Lok Sabha election agiba sülen Centre nung sorkar amenoktsü atema Uttar Pradesh aser Bihar nati telemtetba agitsü, ta metetdaktsü.
Tanü Lucknow nung SP Tir, Akhilesh Yadav ajuruba sülen osangbenertem den jembidang Yadav-i, “Loktepba osangji UP nung dang masü linük ajak süngogo. Centre nung sorkar akumtsü atema UP aser Bihar nüburtemi telemtetba agitsü,” ta metetdaktsü.
Uttar Pradesh nung Lok Sabha menden 80 aser Bihar nung Lok Sabha menden 40 lir.
RJD lenirisa yasüng BSP tongti, Mayawati-a ajurua liasü.
Yadav-i, “UP nung Lok Sabha menden 80 aser Bihar nung menden 40 lir. Jharkhand nunga menden 14 lir, aser ajakji senteperbo state asem nungji menden 134 lir. Item state nungji teloktep den BJP menden 115 lir, BJP-i menden 100 mangutsü,” ta metetdaktsü.
Nüburtemi BJP dang mepelar, ta shia Yadav-i, Ato kilonseri maongka balaka nangzüka ashioktsütsü atema Bihar-ia aruogo, ta ashi.
Bihar Chief Minister, Nitesh Kumar-i RJD den teloktep raksar BJP nung adenba atema-a pai aija jembi.
“BSP aser SP na loktepbaji tesülenbo tenüngsang agutsütsü. Ibaji ajanga RSS dang nungi linük kümzüktsü,” ta pai ashi.
Tejashwi Yadav-i ashiba agi, pai BSP aser SP na nem tenüngsang agutsütsü atema pai Lucknow semdang, ta metetdaktsü.
“Linük nung mesangdongaka Emergency lir aser nija tajangzük angutsü atema reju ajak raksatsür, iba denji külemi MS Golwalkar (RSS lenir)-i renemba temzüng benoktsü meranger,” ta paisa shisem.
“Onoki (RJD)-i Uttar Pradesh nung teloktep pusemtsü,” ta pai ashi.
Ano Akhilesh-ia, Tejashwi-i semdangba ajanga teloktep taliba tashi itshitsü, ta ashi.
Tanü linük nüburtemi BJP dang mepelar aser tan aliba sorkar menden nungi atsüngdokner, ta paisa ashi.