Centre nungi teshimtet telok kati Assam nung JE tashidak tendangogo

Guwahati, July 26 (Agencies) : Union health ministry nung nisung anati akümba telok kati state health ketdangsertemi den ajurutepa Assam kübok district ajak nung Japanese encephalitis (JE) data reprangdangogo, ta State surveillance officer (SSO), B C Bhagawati-i metetdaktsü.
Taoba hopta atong Centre nungi telokji aru aser parnoki disease-prevention system nung metokmeperi alibatem reprangdangogo, ta Bhagawati-i ashi.
Iba telok jagi JE tashidak adokba district tem – Kamrup, Darrang aser Nalbari nung hospital infrastructure, diagnostic facilities aser community response nungertem reprang.
Parnoki state nung JE tashidak menatepa aoba asadang aser Assam ajungalen vaccination alitsüla ta ashi, ta Bhagawati-isa shisem.
“Asenoki nübortem dang iba tashidak indang temetettsütem metetdaktsütsüla. Nisungtemi JE tashidak atema süoki ia mebilemer aser mapang shitak nung mozü machir, parnok dak JE tashidak lir ta meteta arur anepalutsü tenzükdangbo joko menur alir” ta paisa ashi.
Honibarnü Union ministry of health-i Assam nung JE tashidak anepalutsü atema specialist doctors aser paramedics adenba telok asem yoktsü ta osang metetdaktsüogo.