Centre sorkar dang tejashiba mali: Harish Rawat

Dehradun, May 11 (Agencies): Maneni Uttarakhand chief minister akumtsü alisang aser Congress lenir, Harish Rawat-i, Centre sorkar dang tejashiba mali aser state terenlok atema Centre teyari nüngdaktsü, ta ashi.

Tanü Centre sorkari Supreme Court dang parnoki state nungi Tir yimsüsüba agiener ta metetdaktsüba sülen osangbenertem den jembidang taoba state Chief minister Harish Rawat-i, “Koda masüba mapang ka liasü, terata nung aliba mapang ka liasü aser state-i takoksa aika nguogo. Ajisüaka junga tembangba ajakji tajung,” ta ashi.

Taküm March 27 nü Centre sorkari pa Chief minister menden nung anentsüba sülen Tir yimsüsüba benoka liasü.

Rawat-isa, BJP-i aniba Centre sorkar aser Attorney General (AG), Mukul Rohatgi-i Supreme Court dang state nung Tir yimsüsüba agientsü atema telemtetba agiba metetdaktsüba ajanga mapa tajung sayuogo, ta ashi.

Rawat-i menürema, “Onoki Centre sorkar teyari nüngdaker. Ozü state ya tilaka dang saka onok mangdangjibo tulu,” ta ashi.

Anogo 45 tashi state sorkar tashi atema rara aruba sülen Mongolbar nü assembly nung floor test agia nübo sayutepdang Rawat-i majority anguba sülen tanü pai taoba mapang pa nungitertem aser tang pa nungitertem densema ajak dang pelaba lemsatep.

Paisa, pa majority sayutsü atema Supreme Court-i temelaba agütsüba ajanga nüburtemi India nunger judiciary aser temzüng nung tamang taliba kateter, ta ashi.