Centre sorkari Budget onük nung o melemtepner: TMC

New Delhi, Tsüklai 09 (Agencies): Tanü Trinamool Congress MP, Derek O’Brien-i, ruling party-i Rajya Sabha nung timtem agutsür, kechiyong parnoki Union Budget onük nung o melemtepner, ta aitsü.
Congress lenir, P. Chidambaram-i Rajya Sabha nung Budget onük nung jembidang treasury bench züngsemtemi yimyim ayima timtem agutsüba sülen anogo ka lir tanü New Delhi nung osangbenertem den jembidang Trinamool Congress lenir, O’Brien-i, “Opposition-i asüngdangbatem atema sorkar telangzütsü mali. Anungji metetsümonga Rajya Sabha nung parnoki timtem agutsür,” ta ashi.
Yakünü Congress Party lenir, M. Veerappa Moily-i Lok Sabha senden nung jembidanga treasury bench züngsemtemi timtem agüja liasü.
Yakünü Ato kilonser, Narendra Modi-i jembidang House anaprongla nung ruling party züngsemtemi yimyim ayima timtem agüja liasü.
O’Brien-isa, sorkari Parliament ama reju ka mezüngmeshir, ta ashiba den külemi General Budget aser Railway Budget na ka dang kümdaktsüba atema tasüngdangba aka.
“General Budget nung ghonda 12 aser Railway Budget nung ghonda 12 sa o lemtepa aruogo. Ajisüaka Budget ana ka dang akumba ajanga item tu mali kümogo,” ta O’Brien-i ashi.
Railway atema sen lemzüktsüba onük nung tasüngdangba aika asüngdanga O’Brien-i, opposition party tem sorkar tashi nung aliba state tem nem sen ishiba lemzüktsüogo, ta aitsü.
Pai, West Bengal aser Delhi den medemdangra Uttarakhand, Rajasthan aser Gujarat ama BJP sorkar aliba state tem nem sen timba lemzüktsüogo, ta aitsü.