Centre sorkari Guwahati-Shillong tsüngda seaplane service agizükogo

Shillong, March 04 (Agencies): Tourism ajungkettsütsü nükjidong nung Civil Aviation Ministry-i Guwahati nung Brahmaputra ayong aser Meghalaya nung Umiam ayong na tsüngda seaplane service tenzüktsü atema melungogo.
Shillong MP, Vincent Pala-i, iba onük atema Civil Aviation Minister, Suresh Prabhu den o lemtepba sülen Union minister-i ibaji agizük, ta metetdaktsü.
Tzüyim nung senzüba tayimtsütemji tzü nung anentettsü aser tzü nungi apusotettsü atema ‘powered fixed-wing’ keta lir. Item tayimtsü jagi ali nungia anüngi yimketa tutettsü. Iba tayimtsü dang amphibious aircraft taka ajar.
Pala-isa, pai Civil Aviation Minister dang state nung aviation sector nung jangrar lanurtem nem training agutsütsü atema Shillong airport nung training centre ka amenoktsü takhangba agutsüogo, ta metetdaktsü.
Yaküm Aviation Ministry-i linük nung water aerodromes amenoktsü atema agizüka liasü, mezüngbuba airdromes ji Odisha nung Chilika awatsüng, Gujarat nung Sardar Sarovar dam aser Sabarmati ayong nung amenoktsü.