Centre sorkari media ola madokdaktsür: Rahul Gandhi

Ahmedabad, September 04 (Agencies): Gujarat nung assembly election agitsü joko mapang ana nung lia Hombarnü Congress tatong Tir, Rahul Gandhi-i assembly election atema nüboyim tenzükogo; tanü pai state nung assembly 180 nungi party lenirtem den senden mena liasü.
Ahmedabad nung party nung inyakertem den jembidang Rahul-i aluyimertem tebilemtsü, mapa manguba tebilemtsü aser ochimashi onüktem nung jembia liasü.
“Gujarat-i linük tesem ajunga dang lenmang sayutettsü. Gujarat indang tashiji small business nung lir, ajisüaka parnoki sorkar dang nungi teyari kecha mangur,” ta Rahul-i ashi.
“Ni Gujarat nung aliba tribal nisungtem dang ya nangzüker- onoki ner lima nung nenok li aser temeten kümzüktsü atema inyaktsü,” ta pai ashi.
Demonetisation dak sendakba nung Rahul-i, “Raghuram Rajan-i (RBI Governor) sorkar dang, sen nokdangba ajanga tajangzük kecha mangutsü saka takoksa ang angutsü ta ashi, ajisüaka asen Ato kilonseri tashi manger,” ta paisa ashi.
Union sorkar aija Rahul-i, “Gujarat nunger aluyimertem sentsüh sen crore 36,000 tashi lir. Modi-i Tata company nem sen crore 36,000 bank loan agütsü, aser parnok indang Nano project atema sen crore 60,000 agütsü. Iba senji Gujarat nunger aluyimertem indang sentsüh anasü asütsü. Ajisüaka nisung kari danga Gaujarat lenmangtem nung Nano (gari) ngur ma?” ta asüngdang.
Osangbenertem ola nokdangba dak sendakba nung Rahul-i, “Ato kilonser anema züluner osangbenertem lir, ajisüaka tang mapang ya nisung ka kijai yimsüsüba mapang ka lir, anungji iba yimsüsüba kübok parnoki ola madokteter,” ta ashi.
“Gujarat nung taruba sorkarbo Congress-i akumtsü aser shingaia onok menokdangtettsü. Gujarat model ji tazüngla ta nüburtemi metetogo,” ta Congress lenirisa ashi.