Centre sorkari National security nung tamakok nguogo: Congress

New Delhi, Tsüklai 03 (Agencies): Tanü Congress Party-i, Centre sorkari national security tsütsü tamakok mejungi nguogo, ta aitsü.
Congress party communications in-charge, Randeep Singh Surjewala-i, linük sorkari linük arrtsütem kümzüktsü mapa nung tamakok nguogo, ta ashi.
BJP MP, Maheish Girri-i, tsükchirtem asalentong tamajung matalokdaktsütsü atema külemküja ka ayongzüktsü, ta sangdongba aija Congress leniri, “India nunger tongtibang onüktem kümzüktsü atema asalentong yanglutsü melen parnoki (Centre sorkar) külemküja nung ang metaloker,” ta ashi.
Taoba ita BJP lenir, Girri-i, tsükchirtem asalentong tamajung matalokdaktsütsü atema Metsüremi (March) 18 nungi tenzüka hopta ka piyong ‘Vedic yagya’ ayongzüka agitsü, aser iba sentong nung adentsü asoshi linük Tir, Ram Nath Kovind aser Ato kilonser, Narendra Modi nata jaokogo, ta metetdakja liasü.
Surjewala-isa, linük telung aser bendanglen naprong nungi amokmeren aliba nungi India arrtsü kümzüktsü mapa sorkari sendokogo aser Ato kilonseria Pakistan nungi kiralongra menokdangteter, ta aitsü.
“Külemküja aser sarasadembaji asen tangatetba aser tamang indang lir, ajisüaka sorkari külemküja kija agi national security mapa meküpdoktettsü,” ta Congress lenirisa ashi.
“Modi asalentongtem ajungkettba nung pa kanga mazüngi lir, ajisüaka asen anüdoklen, anüolen, anüdok tip, anüolen tip tsütsü nungi amokmeren aliba indangbo pai memeteter. China sorkari India arrtsü alema aiter aser Doklam plateau nung par mitkartem mitsa yanglur,” ta pai ashi.
Surjewala-isa, “China-Pakistan Economic Corridor jagi Pakistan-occupied Kashmir adener aser tangbo Pakistan kübok Gwadar Port aser Sri Lanka kübok Hambantota Port naprong nung China nunger amenokogo. Ajisüaka BJP sorkari ola madoki repranga dang toktsür külemküja nung dang metaloker,” ta aitsü.