New Delhi, June 08 (Agencies): BJP-i aniba NDA sorkari tesüiba küm ana parnok yimsüsüba mapang ochimashi keno maliasü ta jembiba aija tanü CPI-i, Lalit Modi ken o aser Vyapam ochimashi ken o densema Centre sorkari ochimashi ajak miimbanga ayutsü meranger, ta ashi.
“Onoki iba oji jazüker (NDA-i ochimashi maliba sorkar ta jembiba). Mezüng küm nunga Lalit Modi ken o nung Union Minister Sushma Swaraj aser Rajasthan Chief Minister Vasundhara Raje na tenüng densema liasü,” ta CPI-i ashi.
Osangbenertem den jembidang CPI general secretary, S Sudhakar Reddy-i, “Tai tongloktsübatemji balala aser item kuliji balala agütsür. Ajisüaka iba sorkari item tai tongloktsübatemji bushisüngdangtsü merang. Memelungba ajanga (bushisüngdangtsü) parnoki ochimashi nembanga ayutsü meranger,” ta ashi.
Ochimashi melira kechiba iba sorkar yagi bushisüngdangdaktsütsü memelunger, ta paisa asüngdang.
Madhya Pradesh nung sen crore aika indang ochimashi ken o, Vyapam dak sentakba nung pai, iba ken o nung kulisertem, melung melemteti alirtem aser osangbenertem densema nising 60 shi asüba ya kodanga matalokba ka lir, ta ashi.
Karnataka nung ochimashi ken o nung Lokayukta indang report nung ajemdaker Chief minister menden nungi alusang, B S Yeddyurappa tangbo BJP Karnataka unit Tir kümdaktsüogo, ta CPI lenirisa aitsü.
“Kechiba Narendra Modi-i par sorkar anema ochimashi tai tongloktsüba mali ta jembir. Tang tesüsabuba tatalokba ka nung Maharashtra Minister, Khadse (BJP)-i ochimashi ken o nung anenogo,” ta pai ashi.
Assam densema tawa assembly election agiba state pongu nung BJP vote shilem ajema kümogo ta shia pai, Modi nüngtugu akumba ajema kümdar, ta ashi.
You must be logged in to post a comment Login