Centre sorkari party balala lenirtem den anünga aliba bill tem atema jembitsü

New Delhi, November 16 (Agencies): Tawa Bihar assembly election nung secular party teloktepi BJP madak takok tulu anguba ajanga opposition party tem yimtenren nung akasoshiogo, ta meteta aser taruba Parliament senden kanga sashia agitsü ta angateta Centre sorkari yimtenren party balala nungi lenirtem den jelia tongtibang bill tem indang jembitsü lemtetogo.

Asükwa mongpu Parliament senden November 26 nü nungi tenzüka amentsü aser iba senden nung anünga aliba tongtibang bill aika agizüktsü sorkar tebilemba lir.

Parliamentary affairs minister, M Venkaiah Naidu aser tanga Union minister temi tan hopta opposition party balala nungi lenirtem den item bill atema jembitsü sentong lir. Parliament metenzükdang jelia party ajak senden-a amentsü.

Ordinance asem ozüng akumtsü, iba dak alia sorkari GST bill, legislation on labour reforms aser real estate regulation bill agizüktsü tebilemba lir.

Item ordinance asem ji Negotiable Instruments Act, commercial jurisdiction of high courts aser arbitration indang lir.

Tan mongpu senden anogo 18 amentsü.

Tawa Bihar assembly election nung JD(U)-RJD-Congress teloktepi BJP-i aniba NDA teloktep anema takok anguba sülen opposition party temi taruba Parliament senden nung linük nung akhümtsübutep maliba onük nung sashia noktaktsü tebilemba lir, anungji senden junga mekatettsü südi ta sorkari arendaka bilemer.

Tang linük nung tebilemtsü onüktem nung opposition party temi Ato kilonser Narendra Modi dang nungi telangzüba meshitsüa akok aser sorkaria tekong merangra senden junga magitettsü südi.