Centre sorkari ‘Special Maternity Leave’ agütsütsü

New Delhi, September 2, 2022 (Agencies): Centre sorkar mapa inyakba tetsür kar tanur tasü sora mesüra tanur sozüker tatsüka lir tanurji tasüba ajurura parnok nem anogo 60 nü ‘special maternity leave’ agütsütsü ta Department of Personnel and Training (DoPT)-i Hokolbarnü metetdaktsü.

Tanur tasü asoba mesüra tanur asoba sülen asüba ajanga emotional trauma adokdaktsür aser tetsü ka taküm nung kanga mejungi kongshiba nung ajemdaker iba lemtet agiogo.

Tanur tasü asoba mesüra sozükli asüba ajurudang leave/maternity leave agütsür asü magütsür ta DoPT dangi tasüngdangba aika aru.

“Iba atema onoki Ministry of Health and Family Welfare den asüngdangtepogo aser sorkar mapa inyakba tetsür kati iba ama tia ajurura la nem anogo 60 nü special maternity leave agütsütsü telemtetba agiogo” ta DoPT-isa metetdaktsü.

“Sorkar mapa inyaker tetsür kati maternity leave meshiadoker lira aser tanur asüba sülen tashi la indang sodiji lira, lai tanur asüba tashi agia aliba maternity leave ji la indang leave account nung leave mashii ka ama melentsü akok, aser iba atema medical certificate memeshitsü. Iba sülen lar tanur asüba anogo nungi la nem anogo 60 nü special maternity leave agütsütsü” ta DoPT-isa ashi.

Tanur ka sor anogo 28 tashi nung tasüba ajurura special maternity leave agütsütsü ta DoPT-i central government ministries/departments ajak dangi tetuyuba yokogo.

Iba special maternity leave ya centre sorkar mapa inyakba tetsür asütsüla aser laji tanur ana teküpok tetsü ka asütsüla aser authorised hospital ka nung tanur asotsüla, ta DoPT-isa metetdaktsü.

Authorised hospital ta asübaji Central Government Health Scheme (CGHS) kübok empanel süa aliba sorkar mesüra nija mozüki lir. Ajisüaka non-eampanelled private hospital ka nung emergency delivery asüba süra emergency certificate alitsüla, ta DoPT-isa metetdaktsü.