Centre sorkari Vijay Mallya jendaktsü: Congress

New Delhi, March 10 (Agencies): Brihostibarnü Congress Party-i anir opposition party temi, Centre sorkari Vijay Mallya jendaktsü ta aitsüba sülen Union Finance minister, Arun Jaitley-i, Vijay Mallya ket nungi sen ajak angutsüsa bank temi akokba ajak inyaktsü, ta ashi.

State Bank of India (SBI) densema bank tentet kati shishilembar tetsüdi, Vijay Mallya anema sentsüh ken o benoka lir, aser sorkari ashiba agi pa March 2 nü linük toktsür ogo.

“Banks aser parnok consortium-i Vijay Mallya anema inyaktsü tenzükogo. Pa indang kiojen rongsentem-a densema lir,” ta tanü Arun Jaitley-i Lok Sabha nung metetdaktsü.

Parliament telung aser kima naprong nung opposition party temi iba onük nung sorkar anema noktakogo.

Iba onük nung Ato kilonser Narendra Modi aija Congress tatong Tir, Rahul Gandhi-i, “Kodaser Mallya-i jena otet (?) Kechiba pa aotsü sorkari mela(?)” ta asüngdang.

Rajya Sabha nunga iba onük süoka Opposition lenir, Ghulam Nabi Azad-i, “Talang nungi majitettsüsa Mallya ya ajem ama oset tilaka masü. Kechiba Vijay Mallya mapu (?) Kechiba pa indang passport pua mayu (?)” ta asüngdang.

Ano Congress lenir Jairam Ramesh-ia, “Tasüngdangba onükji, shibaisa Mallya nem sen aputsü ta masü saka kechiba pa India toktsür aotsü temelaba agütsü. Kechiba Vijay Mallya linük toktsür aotsü mela (?),” ta asüngdang.

Sorkari Vijay Mallya jendaktsü ta Congress-i aitsüba o meyipja Jaitley-i, “UPA sorkar mapang nung Mallya nem sen aputsübaji asenoki mamatsüla. 2004 küm Mallya nem mezüng sen aputsübaji UPA sorkar mapang lir. Anogotem jagi parnok sasa jembir,” ta ashi.

“Kechi kodaser sen aputsütsüsa akum ta asüba onükji bushisüngdangtsüla, aser ibaji CBI-i bushisüngdangdar,” ta paisa ashi.

Jaitley-i ashiba agi, November 15, 2015 tashi nung sen temlok densema bank tem dang Mallya sentsühji crore 9,091.4 lir.