CEO-i AHODs, HODs aser tanga ketdangsertem den senden ka amen

Dimapur, April 2 (TYO) : April 1, 2016 nü Nagaland Chief Electoral Officer, Sanjay Kumar, IAS-i pa indang official residence nung AHODs, HODs aser tanga ketdangsertem den senden ka amen.
March 1, 2016 nü Election Commission of India ajanga tenzükba National Electoral Roll Purification (NERP) aser Systematic Voters’ Education and Electoral Participation (SVEEP) programme atema iba senden ya amen.
Electoral Rolls (ER), Polling Stations (PSs) aser Basic Minimum Facilities (BMFs) onüktem asoshi Election Commission of India-i NERP 2016 ta ser sentong ya tenzük aser iba nung temsüa aliba sensotem tenüng züluoktsü, tenüng talila alirtem agientsü, tasür mesüra tesem belenertem reprangshimtsü aser EPIC o data meshitak enoka aluiba metongshitsü, ta senden nung Sanjay Kumar-i ashi.
Senden nungsa Nagaland CEO-i election nung ozüng alema maparen inyakba aser census nung tim mesüi inyakba ajanga Electoral rolls nung timtem ajuruba indang khurettem benoka lemsatep. Paisa, sorkar Department ajaki election dak sendakba maparen nung ECI-i lateta aliba ozüng kübok shilem agitsü ayongzük.
Senden nung School Education Director, Senthang Rengma-i, elections mapang tim masüba maparen mita reprangtsü aser ibala inyakyim tamajung nungi vote agütsürtem kümzüka ayutsü atema Special Security Forces tentet nung ajungtsü, ta tebilemba ka lemsatep.
Urban Development Secretary, Ahola Those-ia, vote agütsütsü asoshi küm agi matongertemi noktangtsü atema tebilemba ka shidang.
Lai ashiba agi, election mapang polling station tem nung arishi küm 14 nungi 17 tsüngda alirtem vote agütsütsü atema adenshir. Ajisüaka, administrative officer mesüra polling officials-i parnok menoktangteter kechiyong parnok tenüng electoral roll nung züluoka alir.
Election mapang yimtenren telok balalai administrative officer aser election officer nem timtem agütsür, aser ibala mapang ECI-i lateta agütsüba temzüngtem ajanga dang ketdangsertem kümzüka ayur, ta PHE Joint Secretary, Akumla Chuba-ia metetdaktsü.
Ano, Higher Education Director, Alempokba-ia, vote agütsürtem jangjatsü atema inyakyim ka tenzüktsü atema tebilemba ka benok.
Paisa, ambassadors dang sentong tajung ayongzüka nübortem dang election nung tim masüba inyakyim meinyaktsü atema tesayuba agütsütsü mepishia metetdaktsü.
NBSE Secretary, Asano Sekhose-ia shisaliok ajanga election dak sendakba maparen melenshitsü indang tashi aliba onük lemsatep.
Iba senden nung Assistant CEO, Awa Lorin-i NERP indang inyakyim tatsü agi telok dang metetdaktsü.