CEO-i Government Associations den senden amen

Dimapur, April 6 (TYO) : National Electoral Roll Purification (NERP) programme 2016 aser Systematic Voters’ Education & Electoral Participation (SVEEP) maparen nung shilem ka ama Chief Electoral Officer, Nagaland, Sanjay Kumar-i April 6, 2016 nü Hotel Japfu nung Government Associations den senden ka amen.
Iba senden nung Sanjay Kumar-i electoral rolls merüktettsü indang onük tongti süa jembi aser pai sorkar kübok telok ajak dang pei pei telok nung iba asoshi mapa inyaktsü ayongzük.
Senden nung NCS tir, Kevin Zehol-i electoral rolls nung timtem malitsü atema Aadhaar den sendakteptsü tebilemba lemsatep.
Kevin-isa, BLOs & TOTs nem training tajung agütsütsü tebilemba metetdaktsü.
ANSTA, Tongti Tezülur, Visato Koso-ia, yimtsüngtem nung tilatiba jenjang nung lanurtem teyari agia sensitization programme agitsüla, ta tebilemba lemsatep.
Senden nung adenertemi Biometric system ajanga mapa tulu inyaktettsü lenmang aliba lemsatep. Parnoki ashiba agi Biometric system ajanga electoral roll nung tenüng aiben züluokba inyakyim agientsü aser election department-i tang inyakba mapa nung teyari tulu angutsü.
Iba senden nung mendenji Deputy CEO, K. Sema liasü aser Assistant CEO, Awa Lorin-i anküp tepela o jembi.