CEO office-i Sanjay Kumar den tepila sentong agi

Chief Electoral Officer, Nagaland, Sanjay Kumar, IAS-i tepila o jembidang agiba noksa angur.

Dimapur, January 13 (TYO) : January 13, 2017 nü Chief Electoral Officer office-i CEO, Sanjay Kumar, IAS den tepila sentong ka ayongzüka agi.
Sentong nung Chief Electoral officer menden nungi alur Sanjay Kumar-i o jembidang, pa taküm nung mapang tajungji Nagaland nung aliba liasü aser teti Nagaland nung aliba nübor tajungtem teti bilemtettsü, ta ashi.
Pai inyakba kümsük nung ketdangsertem aser staff temi pa pusema nungitba, temeim sayuba aser angateta yaritepba atema pelar aser maneni iba tangatetba nung Department jenjang tajungba kümdaktsütsü atema Sanjay-isa ayongzük.
Sanjay Kumar-i Election Department toktsür Ministry of Human Resources (HR) nung Joint Secretary, Education Department, Delhi inyaktsü.
Sentong nung CEO office tenüng nungi jembidang, Joint CEO, N. Moa Aier-i ashiba agi, Department ajanga tatishitsü keta mapa tajung aika inyakogo aser tongtipang mapa kaji National Electoral Roll purification (NERP) takok ngua inyaktetba liasü.
CEO menden nungi aluri pai inyakba kümsük mapang district aika sema senzüogo, ta Moa Aier-isa shisem.
Iba sentong nung mendenji Deputy CEO, Khekugha Sema liasü aser DEO Office tenüng nung AEO Kohima, Mhathung-i o jembi.