Chad-i Boko Haram züngsem 10 nem tasüba temerenshi agütsür

N’DJAMENA, August 29 (Agencies): Chad nung tentetba okadak kati Boko Haram kiralongrar telok züngsem 10 nem tasüba temerenshi agütsüba osang ka Chad’er prosecutor kati tanü Honibar nü metetdaktsüogo.
Ozüng alema pokshitsü osettsüset abenba aser nisung tepsetba ken o nung aitsüba sülen par 10 nem tasüba temerenshiji yashi, Hokolbar nü agütsüba osang jangjaogo.
Nigeria den külemi, kidangsüa aliba linüktem nung lendong kanga sashia atalokdaktsüba Boko Haram telok lenir, Mahamat Moustapha ta ajaba Bahna Fanaye-a tan merenshir rong nung densema aliba olen ka Bruno Mahouli Louapambe-i metetdaktsü.
Nigeria den kidangsüa aliba Cameroon, Benin, Niger aser Chad nungeri külemi lungjemer teloktep mitkar telok ka tenteta Boko Haram telok anema raratsü renema lir aser iba maparen nung par linüki tongti shilem agitsü tenangzükba ka Chad-i taoba mapang agia lir.
Nigeria Islamist yimli kümdaktsütsü merangba Boko Haram züngsemtemi taküm June o July ita na nung Chad yimtiba, N’Djamena nung bomb lendong ishika atalokdakja nübur jenti tepsetba osang bushiteta lir.
“Tan temerenshi agizükertemi parnoki aibelena inyakba nangzükogo aser parnok nem o bendang agütsüba ama prangpong injang agi kaseta merenshitsü renema lir,” ta Louapambe-i metetdaktsü.