Chad nung bomb lendong atalokdak; 14 pokset, 74 shi yiru

Peisasa pokseta asütsü melungteter kati pa temang nung alenokba bomb pokdakja Chad yimtiba, N’Djamena nung tentetba shishilembadak ka anasa tanü Honibar nü lendong atalokdaktsüba sülen mitkar aser police ketdangsertemi lendong atalokdak bushisüngdangba noksa nung angur.

 N’Djamena, July 11 (Agencies): Peisasa pokseta asütsü melungteter kati pa temang nung alenokba bomb ka pokdakja Chad yimtiba, N’Djamena nung tanü Honibar nü lendong atalokdaktsüba osang jangjaogo ta police otongdar kati metetdaktsü.

Tetsür ama süoshi semer arusangi tanü shishilembadak atalokdaktsüba lendong nung ishiba agi nisung 14 poksetba aser nisung 74 shi yiruba osang tang tashi jangjaogo ta Paul Manga-i ashi.

Tanü lendong atalokdaktsüba atema telok shingaia tang tashi nung tenüng agia metetdakja mali saka tanü lendongji Nigeria nung tentetba kiralongrar telok, Boko Haram  mapa asütsü akok ta Manga-i temulung malemba olen ka lemsatepa liasü.

 “Ozü Chad densema Nigeria den kidangsüa aliba linüktemi külemi lungjemer mitkar telok tasen ka tenteta Boko Haram telok anema raratsü tenzükba yong par teloki iba maparenji kepzüktsü mechi tanü amala lendong balala Nigeria den kidangsüa aliba linüktem nung atalokdaktsüba osang bushiteta lir,” ta pai ashi.

Tanü lendong atalokdaktsüsangi Muslim tsürtemi agiba burqa sübotsü agir shishilembadak telungi aitsü merang saka police ketdangsertemi pa nokdangba yong pai pa temang nung alenokba bomb-ji pa anendaktsüdak pokdakja lendongji atalokdaktsü ta Manga-i metetdaktsü.

Ozüng alema inyakertemi pokshiba aser iba amala lendong atalokdaktsütsü osettsüset burqa telung nung bener shibelenba nokdangtsü nükjidong nung Chad sorkari taoba June ita nungi tenzüka tekolak nungi tetsüng tonga temanga ajunga meyibangba burqa sübotsü magidaktsütsü ozüng latetba osanga jangjaogo.

Nigera Islamist linük ka kümdaktsütsü asoshi sorkar anema nokdakba telok, Boko Haram meshi meshia samatsütsü nükjidong nung Chad-i Nigeria, Cameroon aser Niger linüktem den külemi lungjemer mitkar telok tasen ka tenteta Boko Haram den kanga sashia raraba osanga bushiteta lir.