Chakhesang Baptist Church Seluophe tenlaki tasen ka meshitetogo

Dimapur, Metsüremi/March 01 (TYO): Chakhesang Baptist Church Seluophe, Dimapur indang tenlaki tasen ka February 28 nü meshitetogo. Iba tenlaki tasenba ya Kuzholuzo (Azo) Nienu’er kibongi rongsen tenla yangluba lir. Iba tenlaki meshitetba sentong nung jembiba mapang Azo-i Tsüngrem nem tenüngsang agütsü aser nisung kati Tsüngrem, tsürabur aser kibong indang temeim amadokra mesüra nüburtem tenzükba anenra ali rongsen ya tagidak maka akümer, ta ashi.
Chakhesang Baptist Church Seluophe den tesendaktep aliba bilemteta jembiba mapang, Seluophe Chakhesang Baptist Church nung sentong ka nung pa Tsüngrem o jembitsü jaokba aser iba mapang tekülem ki teraksa tia nung aliba ngua Tsüngremi pa mulungjang nung nüburtem dang aria bilemtsü jembiba indang otsü Azo-i ashi. Iba sülen pai Tsüngrem sentsü wangshidaktsütsü asoshi tenlaki ya yanglutsütsü lemtet, saka pai iba tenlaki yanglu tenzükba mapang pa yimten yimsüsüba tsütsüa mepetmesü jenti adok, ta pai ashi. Timtem aser tatidang jenti ajuruaka pa aser par kibongi tasü ita iba mapa tembanga inyak, ta ashi.
Chakhesang nüburtemi sarasadem nung nungita lenmang balala nung ajungshiba asoshi pelaba lemsatepdang ashiba agi, “Kibur asen kümtetdakba asoshi mapa inyakba mapang tepela agi asüngba ama taküm nung tepela mali. Tsüngremer tenlaki yangluba ajanga tepela nüktzü alur aser temulung nung tesunep alir.”
Iba Chakhesang Baptist Church Seluophe ya Chakhesang Baptist Church Council indang Executive Secretary Rev. Khrotso Mero-i Tsüngrem nem bendanga agüja meshitettsü aser Pastor Musilo Nusory-i sentong ania liasü. Lasa sentong nung CBC Minister’s Hill nungi Senior Pastor Rev. Dr. Vevo Phesao-i Tsüngrem o jembia liasü.