Chakhesang nunger benjung Sukrunye longsoa mungogo

Kohima, January 14 (Agencies): Tanü Kohima nung Chakhesang Naga nunger tongti benjung ‘Sukrunye’ amungdang, Naga lokti nung akhümtsübutep, maitsü, temeim aser kati ka agizüktetba yimya tajungtem asentenshitsü atema ayongzük.
Sukrunye ya tetsür aser tebur naprong meshitetba benjung ka lir, aser iba benjung ya state tesem ajaklen Chakhesang Naga nungeri amunger. Parnok ya Phek district nungi lir.
Iba benjungmung omen “Strengthening unity and harmony” nung State Assembly Speaker, Chotisuh Sazo, Parliamentary Secretary, Neiba Kronu, MLA tem aser tongtibang nisungtem aika dena nisung 15,000 shii shilem agia chiyungtepa mungogo.
Iba sentong nung Chakhesang Hoho, Kohima Tiri tangar kin ajak den amaliteptsü aser telongjem ajungkettsütsü ajungshi.
“Asenoki tesüiba mapang yimya tajungtem asentenshitsü atema süoki ia inyaktsüla aser tamajung yimyatem amadoker tejakleni aotsü atema yimya tajungtem tanaben angazükshitsüla,” ta Tiri ashi.
Kohima Village Council chairman, Medoselhou Keretsii-ia sobaliba yimya tajungtem asentenshitsü aser tetsü-tebou mapang yimya tajungtem ajungkettsü nüngdak, ta ashi.
Tesasaba olen ka nung pai ashiba agi, putu tasen aser technology ainba ajanga sobaliba yimya tajungtem samaa aoer.
Paisa, Angami aser Chakhesang nunger tsüngda adianu melungsentsü akhangjungshiteptsüla, ta ayongzük.
Sumi Hoho Kohima Tir, Dr. Vinito Chishi-ia, Chakhesang, Sumi aser Angami nungerji adianutem lir, Angami ji tambu, Chakhesang ji tanabuba aser Sumi ji tanubosang lir, ta ashiba den külemi Sumi aser Chakhesang nunger tsüngda adianu tesentaktep maneni alitsü ajungshi.
Chakhesang Public Organization Tir, Kekhwengulo Lea-i Chakhesang nunger dang, Chakhesang nunger dak tamang katetba aser telongjem alibaji maneni wazüka ayutsüla, ta ayongzük.
“Chakhesang nungeri tanü benjungmung omen nung shia aliba ama litettsüla, aser iba benjung ajanga tesüiba mapangtem aibelenba metongshia tejakleni aotsüla,” ta paisa ayongzük.
Kasa anogomung nung taoba mapang state minister, Z. Lohe-i Sükrünye benjung teratet ashi aser Rev. Zhowhuyi Nyekha o Rev. Pusazo Chiizho nati Tsüngrem temoatsü meshizüka sarasadema liasü.
Kasa sentong nungsa Phusachodu village-i Vocal ensemble aser Chakhesang Cultural Research Institute-i sobaliba balala sayaa liasü.