Chakhesang nungertemi shi jangraba mapa toktsütsüla: Sazo

Chakhesang nungertemi shi jangraba mapa toktsütsüla: Sazo

Nagaland Assembly Speaker, Chotisuh Sazo-i 17buba Cultural Festival 2016 cum Suhkrunye 2016 sentong nung jembiba noksa nung angur. (Jan. 28, 2016 Phusachodumi Local Ground).

Phusachodumi (Phek), Jan 28 (TYO): Phek district nung yangi Phusachoduni yimtak local ground nung tanü Brehostibar nü Phusachodumi Youth Society (PSY) pur 17 buba sobaliba benjong den külemi Suhkrunye 2016 benjong mongogo.
Iba sentong nung tongti tesemdanger Nagaland Assembly Speaker, Chotisuh Sazo-i jembidang, “Chakhesang nungertemi shi jangraba mapatem toktsütsüla aser taküm yima melenshir mapa meranga inyakba sobaliba dangi meyiptsüla, ” ta metetdaktsü.
” Asenok ali telong aser tema nung rongsen talubo lir, tzü mopong tajung aser ali temo aketba lima. Iba denji nübortem dak item rongsentemji amshia alima renlokdaktsütsü tashi lir aser sorkaria yarir, anungji asenok dak mapa inyakba sobaliba alitsübaji dang nüngdaker,” ta Sazoisa metetdaktsü.
“Asenok dak mapa inyakba sobaliba junga merenlok tashi asenok tejakleni moutettsü ,” ta paisa ashi.
Speaker-baisa Chakhesang nungertem dang bendanger sobaliba tamajung nem mamoksepdaktsüi sobaliba tajung agizüka benshia aotsü asoshi tayongzükba ken o ka agütsü.
Iba kasa sentong nung Dr Neiphrezo Keditsu, MLA & NSMDC mendenbubaia jembia liasü.
Iba benjongmong sentong nung sobaliba ken aser yar tsüngsangba agi nübortem longsotepa liasü.
Iba sentong nung Phek DC, Murohu Chotso aser Nagaland Legislative Assembly nungi ketdangsertem dena liasü.

You must be logged in to post a comment Login