Chakhesang tetsütemi social check gate lapoka lir

Kohima, Tsüklai 23 (TYO): Chakhesang Clean Election Movement indang telemtetba nung ajemdaker aser Chakhesang litsü nung tensa süngjema ayuba den election tiptema agitsü nükjidong nung Chakhesang Mothers Association (CMA) aser parnok kübok telentemi Phek district nung social check gate tem lapoka lir.
“Tsüklai 27 election atema temesepba yi aser tanga mozütem shibelenba noktangtsü atema tongti lenmangtem nung nübotem mapa lemzükja lir aser onoki senzüsenbonger ajak mita repranger” ta Zuketsa-Pfutsero lenmang nung tetsür volunteer kati osangbener dang ashi.
Chakhesang Clean Election Movement (CCEM)-i tuyuba nung ajemdaker CMA-i Chakhesang yimtsüng ajak nung entry point check gate tem lapoka lir, ta laisa ashi.
CCEM-i CMA dang Chakhesang litsü nung yi mesüra tanga mozütem shibelenba mita reprangtsü aser aputsü atema mapa lemzüktsü.
Iba tetuyuba nung ajemdaker CMA-i senzüsenbongertem mita repranger saka iba tenokdangba kübok security forces, district administration aser ECI election observers maiter.