Chakhroma GB-temi Dimapur-Chumu lenmang sadema yuner

Dimapur, June 29 (TYO): Dimapur aser Chumukedima na tsüngda Highway mesademi akümtsüsa nisung kari ali atsünga aruagi kiojen yangluba ngua kanga mepelai bilemer ta Chakhroma G.Bs’ Union sangdong ka ajanga metetdaktsüogo.
Government-i ozüng agüja aliba ama tang aliba lenmang nungi tezü anatsülen ali tazüng feet 30 bosa ayutsüla, ajisüaka ibaji mangai nisung kari motzü aolena malitsüsa kiojen yangluba jagi lenmang mesademi kümdaktsüba dang masü saka lenmang raksatsü, ta parnokisa metetdaktsü.
Tang Dimapur aser Kohima na tsüngda 4 lane yangluba lenmang yabo Dimapur- Chumukedima lenmang len nungi masü saka tangalen lapoktsü saka tang aliba lenmang yaa sadema yanglutsü sentong nung lir, anungji kodang iba lenmang ya sadema ulushitsüsa kümdir, idangjibo tang lenmang atsüngsepa aruagi kiojen yanglubaji endoktsüsa akümtsü aser iba atemajibo temenok mangutsü ta GB-temisa metetdaktsü.
Anungji, ali kiburtemi tarutsü nung lenmang ulushia yanglutsü asoshi tesem sadema toktsütsüla ta parnokisa metetdaktsüogo.
GB-temisa nübortem dang lenmang anasa gari sadema mesenzütettsüsa süng-long temdangsünga mayutsüla ta metetdaktsü. Iba ama mepishia sangdongba ya ajak ajungtsü bilema inyaker, ajisüaka kari danga tashi mangara loktii tajungba ka inyaktsüsa akümtsü ta parnokisa metetdaktsü.