Chakhroma Students’ Union-i aitsür

Dimapur, September 7 (TYO): September 04, 2015 aonung 8:00 ako meta D.C junction Dimapur nung Rüzaphema students’ union, Game & Sport Secy. Kevichüle den pa tetsü-tanutsü aser tenu nungertem amokmerenba kukua aitsür, ta Chakhroma Students’ Union (CSU) sangdong ka nung metetdaktsü.
Nisung anati pistol agi tuiter parnok amenba gari sabi magütsüra kahsettsü ta amokmeren aser iba sülen tashiyim agi gari rakzüka bener ao, ta CSU tir Rokovi Kruse-i sangdong nung shia lir.
Iba aonungjisa West police station nung osang sangoktsü aser angazükba agi tanü (September 7, 2015) nü police-i nisung anaji puogo, ta SCU tirisa ashi.
Tashiyim agi gari rakzüka bener aoertemji, Changpang nunger P. Ngullie’er jabaso Ejanthung Ngullie aser Kubza nunger Imsenpangba’er jabaso Imnawabang Ao ta jangjaogo. Tenati prangpong agi nisung tespettsü merangba aser tashiyim agi gari rakzüker mapatem Chakhroma Students’ Union-i kukua aitsür, ta sangdong nungsa shia lir.
Police-i mapang magii aibelenertem apuba atema tenüngsang agütsür aser tena ya National Security Act (NSA) kübok aitsütsü akhanger, ta CSU tirisa ashi.
Ejanthung Ngullie aser Imnawabang Ao naprongla bail nung mechioktsüsa ken o benoktsüla aser tena ya Naga yimten telok kar nung züngsema lir asü mesüra rakzükraktemer’ar police-i yimjak nung metetdaktsütsüla, ta Chakhroma Students’ Union-isa takhangba agütsüogo.