Chakhroma Youth organization-i ken o jangjashitsü

Dimapur, Rongchii/April 9 (TYO): Dimapur District, DC office Chiimoukedima-i belener aotsüba ken o dak sendakba nung titsüba aika ajangshiba sülen Chakhroma Youth organization-i ken o jangja shitsüogo. Iba dak sendakba nung Dimapur indang district headquarter ya Chiimoukedima ta tejangja aser shingaia ashishitsü makok, ta parnoki ashi.
District ya Dimapur jila telongtet tila ka ya dang masü saka anüolen tip nung Tsiepama, Piphema, Zhuikhu, Hekishe, Tsii-iima, Medzlphema tesem, anüolen Riizaphema, Zutovi, Shokhuvi, Bade, anüdoklen Nihokhu tesem aser lenden nung Niuland tesem ajak ya Dimapur district küboki aiter.
Dimapur district yagi alinük tulu ka ayimjemer aser nüburtem district kübok tesem balala nung prokshia lidar sürnung kechiba Dimapur nung amedaker aliba Unions mesera lokti tentet ishikati parnok anisüngzüka aliba metoktsüteti mesera Dimapur district ajunga nung aliba nüburtem atema telemtetba agitsüla. Anungji administrative office ya Chiimoukedima-i tangsa tang beneler aotsü nüngdaka lir, ta kasa sangdong ajanga metetdaktsü.
Iba ken o ya kin dak ajemdaker lokti tentet kari nüburtem mangmangdaktsütsü atema osang tai prokshidar, anungji DC Complex tasenba ya Chiimoukedima urban administered municipality küboki aiter ta jangjashitsür. Item loktitentet inyaksangshi ya loktilibaren asoshi lendong lir aser reprangshim mesüi toktsüra meyanglushitettsüsa teraksa adoktsü, ta parnokisa ashi.
CYO-isa, Dimapur deputy commissioner dang district nung mejangjaba lokti tentettem nokdangtsü aser asadanga alitsü mepeshia metetdaktsüogo. Maneni nüburtem dang tangatetba akatsü aser sorkari Dimapur DC office Hq. Chiimoukedima nung amenoktsü atema jenjang tapet agitsü asoshi tamang akatsü atema tir Seyieneilhou aser general Secretary Noseho Peter nati külem sangdong ka ajanga metetdaktsü.