Chakma nungertemi August 17 nü ‘Black Day’ amung

Agartal, Luroi (August) 17 (Agencies): Chakma National Council of India-i kümshia Luroi (August) 17 nü ‘Black Day’ amungtsü ta Rogonü (Hokolbarnü) metetdaktsü.
1971 nung East Pakistan (Bangladesh) kübok Chittagong Hill Tracts dendaktsüba anema parnoki iba anogo amungtsü.
Agartala nung ‘Black Day’ rally ka aliba sülen CNCI tatong tir Aniruddha Chakma-i osangbener den jembidang “East Pakistan kübok Chittagong Hill Tracts (CHT) dendaktsüba ajanga Pakistan nungeri küm aika parnok kanga reshikangshi aser parnok talidak maka kümdaktsü” ta ashi.
Chittagong Hill Tract (CHT) nung kin 10 lir aser parnokji Chakma, Marma, Tipperas, Chak, Murung, Khumi, Lushai, Bowm, Pankho aser Mog lir. Iba tasazük ya 5,138 sq miles lir.
India nüjiso anguba mapang tashi iba tesem nung Buddhist aser Hindu nungertem teimba liasü saka Sir Cyril Radcliffe-i aniba Boundary Commission-i iba tesem ya Pakistan litsü ta sangoktsü.
Luroi (August) 15, 1947 nü Chittagong Hill Tracts indang district headquarters Rangamati Chakma lennir Sreya Kumar Chakma-i India linük wako ayipket. Ajisüaka, August 21 nü Pakistan sepaitemi iba wako atsüzük aser Chakma lennirtem dak India pusemertem ta tai tongloktsü.
“CHT nungertemi India nunger den külemi lir. Onoki memulungi Radcliffe Commission-i CHT East Pakistan nung dendaktsü. Iba ajanga Chakma nunger reshikangshitsü aser samatsütsü mapa tenzük. Tanü onoki August 17 ya Black Day ta ser amunger aser maneni mungyonga aotsü” ta Chakma National Council lennir Aniruddha-i ashi.
Iba anogo ya Assam, Mizoram, Arunachal Pradesh aser linük kübok tesem balala nung Chakma nunger aliba tesemtem nung amungtsü, ta paisa shisem.