Champaran nung PM Modi-i Nitish nem tenüngsang agütsü

Motihari nung National Convention of Swachhagrahis nung Prime Minister Narendra Modi den Bihar Governor Satya Pal Malik, Chief Minister Nitish Kumar aser Union Minister tem agiba noksa ka angur. (Motihari (April) 10)

New Delhi, Rongchii (April) 10 (Agencies): Tanü Prime Minister Narendra Modi-i ‘Swachhagrahis’ (ambassadors of cleanliness) 20,000 shi ka dena telok ka den o jembidang Bihar nung crore aika indang terenlok mapa inyaktsü osang metetdaktsü.
Prime Minister-i Muzaffarpur o Sagauli aser Sagauli o Valmikinagar tsüngda railway line anasü akümtsü atema lung azüngtsü. Paisa Madhepura Electric Locomotive Factory lapoktsü aser video link ajanga mezüngbuba 12000 HP Freight Electric Locomotive aser Champaran Humsafar Express tem tenzüktsü.
Prime Minister-isa Auranagabad Bihar-Jharkhand border section nung NH-2 yanglutsü atema lung azüngtsüba den Motihari nung Indian Oil Corporation Ltd indang LPG terminal aser Sagauli nung HPCL indang LPG Plant lapoktsü.
Champaran Satyagraha küm 100 ajungba benjung nung adentsü atema tanü Modi-i Champaran (Motihari) semdang aser idnagji pai, “Bihari-i Swachh Bharat Abhiyan kanga renloka mapa inyaker. Kobi melii Ganga tzüküm nung metsümeshiba anentsü” ta ashi.
Mahatma Gandhi-i aluyimertem temeten atema British nungertem anema Rongchii (April) 10, 1917 nü Champaran Satyagrah tenzük.
“Gandhiji indang pungmangtem asangsang kümdaktsütsü” ta tanü Modi-isa ashi.
Modi-i mezüngbo Bhojpuri oshi nung jembi aser idangji pai Champaran den mapang talangka tejakdang nungi tesentaktep aliba bilemtetba ashi.
Chief Minister Nitish Kumar-i Bihar nung open defacation free kümdaktsütsü atema mapa inyakba aser mapang tatsüka tsüngda metsümeshidak aika yangluba atema Modi-i pa nem tenüngsang agütsü.
Paisa IAS ketdangsertem dena sorkar ketdangsertem dang merükmeju mapa inyakba atema tenüngsang agütsü.
Tanü Bihar Governor Satyapal Malik, CM Nitish Kumar, Union Minister Ram Vilas Paswan aser BJP lennirtemi Modi pela agizük.
Indian Air Force tayimtsü ka ajanga Modi Patna-i aru aser idak nung jagi helicopter ka nung mener Motihari-i ao, ta police ketdangser kati ashi.