Champions League: Real-i 2-1 agi Bayern akok

Berlin, April 13 (Agencies) : UEFA Champions League quarter-final mezüngbuba asaya nung Real Madrid nungi Christiano Ronaldo-i goal ana yokba ajanga par teloki 2-1 agi Bayern Munich telok madak takok angu.
Mezüng goal bo Bayern Munich-i yok ajisüaka parnoki iba dak tali meyokteti lia asaya tanabuba tesadang nung Ronaldo goal ana yoka iba takok angu, ta osangbenertemi ashi.
Asaya tenzüker minute 7buba nung Bayern Munich nungi Thiago Alcantara-i corner ka metsüba ball Arturo Vidal-i tekolak agi goal tongoktsüba sülen parnoki kanga teimla nung asaya.
Asaya tesadang matongdangsa parnoki ano goal ka yoksemer lila, ajisüaka Arturo Vidal-i handball penalty ka metsü dang gaol meyoktetba ajanga iba maongka magitettsüsa aküm.
Anungji asaya tanabuba tesadang tenzüker minute anabuba nung Real Madrid nungi Daniel Carvajal-i ball ka agütsüba Christiano Ronaldo-i par telok asoshi mezüng goal yok.
Telok ana tsüngda 1-1 lia aser asaya minute 61 anünga lia tia makai Bayern Munich telok nungi Javi Martinez tanabuba yellow card achiba agi asaya toktsür tugutsüsa aküm. Anungji par telok nungi asayar 10 dang akümba sülen team tashi mait aküm.
Asaya minute 77buba nung ano Ronaldo-isa Real atema goal ka yoksem aser iba goal ji ajanga UEFA asaya nung mezüng goal 100 yoker Ronaldo kümogo.
Real-i goal iba dang nungi timba yoker lila, ajisüaka asaya tatemtsü anasa Bayern goalkeeper Neuer-i Ronaldo aser Benzema nati metsüba ball kanga junga nokdangba ajanga 2-1 nungang tembang.
Iba takok ajanga Real Madrid tan agi semi final 7buba-i atonga atur aser Bayern-i par moapu nung 16 ben takok angutsü aliba amajok kümdaktsü.
“Onoki mezüng tesadang kanga junga asayaogo. Asaya mezüng tesadang nung junga asayaba agi onok temulung uludaktsü. Tanabuba tesadangbo asadangtsü tera tasak aser onoki iba tamakok agizüker,” ta Bayern coach Carlo Ancelotti-i ashi.